Игече, климат вашталтмылан кӧра мемнан кундемыште могай гына шукш-копшаҥгым от уж! Ме сентябрь кыдалне кугу ший эҥыремышым шекланенна. Пален налаш манын, вигак интернет деч полышым йодынна. Аргиопа дольчатая гай коеш. Вара уверым «Кугу Какшан» заповедникын кугурак шанче пашаеҥже Г.А.Богдановлан колтенна. Тыгай эҥыремышак улмаш. Тудым эше паук-патиссон маныт. Ты эҥыремыш утларакше Йӱдвел Африкыште, Средиземноморьеште ила. Пошкудо Татарстан Республикын кечывалвел могырыштыжо кок гана ужыныт, Чуваш Республикын кечывалвел ужашыштыже – кум гана. Аргиопым от тӱкӧ гын, нимогай эҥгекым ок ыште. Йоча-влак, йырда эскерыза – шуко оҥайым пален налыда.
Марина СТЕПАНОВА.
Волжский, Упшер.
