Б.В.Всесвятский лӱмеш всероссийский конкурсышто йырвелым шымлыше самырык ӱдыр-рвезе-влак мастарлыкыштым тергеныт. Шукерте огыл тудым иктешленыт. Конкурс онлайн йӧн дене эртаралтын. Марий Эл гыч 10 шымлыме паша да проект дене 15 йоча таҥасен.
Лектыш куандарыше. Кокымшо верым Алина Павлова (Морко, Коркатово) да Кира Кузьмина ден Иван Петкеев (Йошкар-Оласе йоча экологий да биологий рӱдер) налыныт. Роман Лютов (4-ше номеран Медведево школ) да Анастасия Иванова ден Елена Степанова (Коркатово, снимкыште) кумшо верыш лектыныт.
– Шымлыме пашана тыге маналтеш: «Анатомическое строение ксантории настенной и пармелии бороздчатой в разных экологических условиях города Йошкар-Ола». Пӱртӱс арулыкым шотыш налын, кок тӱрлӧ регенчым таҥастаренна. Иктешлымашна почеш, рӱдоласе Димитровский парк – кушкыл-влаклан тӱзланашышт утларак келшыше кумдык, – ойла 11-ше классыште тунемше Елена Степанова.
Тудо да пырля тунемме йолташ ӱдыржӧ Анастасия Иванова «Микология, лихенология, альгология» таҥасыш ушненыт. Ӱдыр-влаклан биологийым туныктышо Валентина Михайловна Васильева полшен.
Оля МАЙКОВА.
Фотом Марий Элысе Образований да науко министерствын «ВКонтакте» воткылысе тӱшкаж гыч налме.
