Марий Элын шочшыжо, актёр, режиссёр Денис Шаблий «Не Иван, или Как приручить Богатыря» фильмым шукерте огыл калык ончыко лукто. Тидын нерген соцкыллаште тӱрлӧ шонымашым возат. Фильмыште кредалмашым, оласе школышто марий йочам игылтмым ончыктат, манын серат. Тыгай фильм йочан чонжым огеш эмгате? Тиде йодышлан психологий шанче кандидат, доцент Т.Н.ГОЛОВАНОВА вашмутым пуа:
– Кажне еҥ фильмым тӱрлӧ семын онча. Чылажат тудын кумылжо, тӱняумылымашыж деч шога. Тӱрлӧ ийготан-влак ик шомакымак тӱрлын умылен кертыт. Подростко-влак дене тӱткӧ лийман, нунын чоныштышт конфликт ылыжын кертеш. Икшыве кеч-могай калык гыч лийже, тудо ешыште торжалыкым ужын, ача-аван йӧратымашыштым шижде кушкын гын, шкенжынат уда койышыжо палдырнаш тӱҥалеш. Тыгай койыш-шоктышыжым ешыште ончыкташ огеш тошт гын, шкеж деч изирак ийготан, ӱҥышӧ, вожылшо рвезе-влак дек кержалтеш.
Фильмыште «национальный конфликт» манме йодышым ончалаш гын, тиде калык дене кылдалтын огыл, очыни. Оласе рвезе-влак Йыванын марий улмыжлан верч огыл тудын дек кержалтыныт, пуйто нуно шкешт деч начаррак рвезым вашлийыныт. Тиде конфликт марий рвезым мунлыракым веле ыштен. Йыван коважын ушан шомакше-влакым колын: осалым кредалын огыл, а кӧргӧ вий дене сеҥыман.
Тиде фильм йочан чонжым огеш эмгате, шонем. Тудым чын умылен моштыман. Изирак икшыве фильмын сай могыржым ужын кертше манын, ача-ава-влаклан йочашт дене пырля ончыман да умылтарыман. Фильм марий йочам марий улмыж дене кугешнаш веле таратышаш.
С.М.МАКСИМОВА, Параньга район Матародо школышто тӱҥалтыш класслам, марий йылмым да литературым туныктышо:
– Родо-тукым поянлык, ешын икоян улмыжо – фильмын тӱҥ шонымашыже. Онар, ялыште илыше кувавай тидым почын пуаш полшат. Финн-угор тукым кылна огеш мондалт. Одо ӱдыр дене Йыванын келшен тунеммашышт, ваш полшымашышт шижалтыт. Чын верч ик ой дене кучедалман. Ӱнарым, ӱшаным шочмо кундем, сурт да калык пуат.
Фильмыште кугыеҥ-влакын лушкыдо койыш-шоктышышт палдырна. Мут-лан, йочан эмганен пытыше чурийжым класс вуйлатыше молан ок уж?! Тиде йодышат тургыжландара.
Илья МОИСЕЕВ, 1-ше номеран Медведево школ:
– Данил шольым дене фильмым уэш-пачаш ончена. Мыланна Онарын рвезе-влаклан полшымыжо келша. Ме тудын вийжылан ӱшанена. Шкежат полышым йодына. Мый дзюдо секцийыш коштам. Икана таҥасымаш тӱҥалме деч ончыч авам дене «Онар полшо» манынна. Тыгак «Позволь своей реке выйти из берегов» ой чонлан лишыл. Шольым дене фильмысе мурым пырля мурена. Тудо кызытсе илышлан келшыше. Олег Тактаровын модмыжым куанен ончена. Интернетыште тӱрлӧ видеом шергалынна. Актёрын ачаже марий улмаш.
