Икте кӧгӧрченым тыныс илышым ончыктышо кайыклан шотла гын, весе тудым огешат шеклане. Кӧгӧрчен-влак пытартыш жапыште шкеныштым озала кучаш тӱҥалыныт. Нунын чотышт ий гыч ийыш кугемеш. Ола урем дене эртен кайыме годым айдеме воктек лӱдде чоҥештен толыт. Тыгай сӱрет ялыштат вашлиялтеш. Амалже раш. Еҥ-влак нунылан кочкышым пуат, южышт кид гыч пукшаш ямде улыт. Тыге ышташ лиеш мо? Ала кӧгӧрчен-влак тазалыклан эҥгекым конден кертыт? Нине йодыш-влаклан Йошкар-Оласе ик ветеринар рӱдерыште пашам ыштыше Виктор Алексеевич Жеглов (снимкыште) вашмутым пуа:
– Кӧгӧрчен-влак индешле наре черым шаркалышылан шотлалтыт. Икмынярже айдеме дек куснен кертеш. Тыгак кайык-шамыч тиян, шуршан лийыт. Чаманен каласыман, кӧгӧрчен тӱшкам пукшымо годым шагал еҥ тидын нерген шоналта. Нуным кучаш, ниялташ ок лий. Кид гыч пукшыман огыл. Черлын койшо кайык воктек мияш лӱдыкшӧ. Нуно сальмонеллёз, туберкулёз, орнитоз, хламидиоз да моло черан лийын кертыт. Эн лӱдыкшылан орнитоз ден сальмонеллёз шотлалтыт. Орнитоз юж дене шарла. Черланыме годым вий пыта, температур кӱза. Сальмонеллёз пагарлан да шолылан эҥгекым ышта. Сандене урем гыч пурымеке, кидым сайын мушман. Нине ой-ка ҥаш-влакым шотыш налыда гын, таза лийыда.
