Уста кӱслезе Ф.Эшмякован ойлымыж почеш, кӱсле 5-6 тӱжем ий ончыч лектын. Тудо кажне гаяк финн-угор калыкын уло. Кӱслем шукыж годым куэ, ваштар, коклан пӱкшерме гыч ыштеныт. Кылжылан шорык шолым кучылтыныт. Эн ончыч кӱсле 8 кылан лийын, XX курымын 30-шо ийлаштыже – 15 наре. 1938 ийыште П.Тойдемар ден М.Маркелов 28-30 кыл марте ешареныт. Курыкмарий мастар Р.В.Кашутин 35 кылан кӱслем ыштен. Марий-влак тиде семӱзгарым кӱсотышто кумалме годым кучылтыныт. Мӱкш онлан таушташ манын, кӱсле дене эсогыл пушеҥге вуйышто шоктеныт. Тиде семӱзгар дене унам вашлийме, сӱан, куштымо да моло семымат йоҥгалтареныт.
Материалым О.М.Герасимовын «Народные музыкальные инструменты мари» книгаже негызеш ямдылыме.
