5 декабрь. Йошкар-Оласе «Юбилейный» спорткомплекс. Тыште калык лыҥ. Кадет форман чатката да рыҥ шогышо ӱдыр-рвезе-влак шинчалан вигак пернат. Ачамландын Геройжо-влакын кечышт вашеш кугу пайрем эртаралтеш. Йошкар-Оласе тӱрлӧ школышто тунемше да 14 ийым темыше ӱдыр-рвезе-шамычлан паспортым кучыктат. А 3-шо номеран школышто 5-ше классыште тунемше-влакым кадет радамышке пуртат (снимкыште).
Йошкар-Оласе 3-шо номеран школышто кадет толкын ий гыч ийыш вияҥеш. Йоча-шамыч Шочмо элнан ӱшанле аралышыже лияш ямдылалтыт. Спорт дене пеҥгыде кылым кучат, тӱрлӧ таҥасымаште сеҥыше радамышке лектыт. Ты кечын 85 ӱдыр-рвезе товатмутым пуыш да кадет удостоверенийым кидышкыже нале.
– Кадет тиде мотор формо, погон да ош перчатке веле огыл. Тиде кугу муткучыш да Шочмо элым йӧратымаш. Тидын нерген эре шарныза да кадет лӱмым чапландарыза! – ойла ЙошкарОла мэрын алмаштышыже Людмила Новосёлова.
Кадет-влакын, тистым нумалын, марш дене ошкылмыштым уна, вуйлатыше, ача-ава-шамыч куанен ончышт. Ойырымо корнышт ончыкылык илышыштышт чын верым муаш полша манын ӱшанат.
– Кадет лияш – кугу чап. Тудо чын верч шогышо да мутым кучен моштышо лийшаш. Акам семынак мыят ынде кадет улам. Тиде лӱмым амырташ огыл манын, тунеммаште, спортышто да тӱрлӧ конкурсышто эшеат чот тыршаш тӱҥалам. Мыят изирак шӱжаремлан пример лийнем, – каласыш Кирилл Киткаев.
Катя СЕРГЕЕВА.
Иван Речкинын фотожо.
