Советский районысо Ургаш школ-интернатыште кум кадет класс уло. Тушто 60 йоча тунемеш. Лицей илыш нерген директорын воспитаний паша шотышто алмаштышыже Татьяна Павловна Домрачева палдара:
– Лӱддымӧ, ушан лияш, шочмо элым аралаш – тыгай девиз кадет классыште тунемше кажне йочан ушыштыжо. Лицейыште келге шинчымашым налаш чыла йӧн уло. Икшыве-влакын тазалыкыштым шуараш тренажёр залым келыштарыме. Лӱйкалыме, вашпижме кредалмаш (рукопашный бой), спорт модмаш секций-влак, куштымаш, хор кружок пашам ыштат. Историйым йӧратыше-влаклан «Исток» кружок моткоч оҥай. Тушто йоча-влак тӱрлӧ проектым возат.
Кадет класслаште тунемше-влак физике да математике урок-влаклан жапым шукырак ойырат: Российысе кӱкшӧ военный училищылаш тунемаш пураш лач нине предмет-влак кўлыт. Ӱмаште кадет классым тунем пытарыше 23 выпускник кокла гыч латкумытынжо ты профиль дене шинчымашыжым нӧлта. Йоча-влак олимпиадылаште уш-акылыштым тергат, тӱрлӧ таҥасымаште мастарлыкыштым тергат. 2015 ий гыч Российысе ДОСААФ-ын Марий Эл регионысо пӧлкаж дене пеҥгыде кылым кучат. Латикымше класслаште тунемше-влак парашют дене кажне ийын тӧрштат. Дамир Галяутдинов ден Ильназ Насыров кодшо ийын сертификатым налыныт. 2019 ийыште Москошто Кадет-влакын Всероссийский погынымашышт 16 гана эртаралтын. Тушто тунемшына-влак тӱрлӧ номинацийыште икымше да кокымшо верла дене палемдалтыныт. 10-шо классыште тунемше ӱдыр-влак «Устремлённые в будущее» всероссийский форумышто чолгалыкыштым ончыктеныт. Тыгак Катя Еменгуловам палемден кодынем. Тудо «Мыйын кугезе кочам» шымлымаш паша всероссийский конкурсын регионысо этапыштыже «Сеҥымашын кугезе уныкаже. Ешын историйже гыч элын историйыш» пашаж дене сеҥыше лийын.
Тений Советский районысо Ургаш лицей «1941-1945 ийлаште Кугу Ачамланде сарыште калыкын геройло подвигше нерген шарнымашым аралымаш» республикысе конкурсышто сеҥыше радамыш лектын.
