Легенде
Какшамарий ялемым пеш чот йӧратем. Тудын шочмыжлан 500 утла ий эртен. Пеш шукерте ожно ял олмышто кугу чодыра гӱжлен шоген. Ялна лийме нерген шукерте огыл кочам мыланем тыгай легендым каласкален: «Арда лӱман илемыште ик марий илен. Тудын кум эргыже лийын: Йомблат, Макай, Матюк. Эрге-влаклан ешым погаш жап шуын. Нуно кугу пушыш шинчыныт да Какшан вӱд дене ӱлыкыла воленыт. Эн ончыч Йомблат илаш верым ойырен. Кызыт тушто Йомблак ял верланен. Макай кызытсе Юлъял олмышто илаш кодын. Тушто кызытат Макай арка уло. Кумшо эрге эше ӱлыкырак волен. Тудлан Юл ден Какшан эҥер-влак кокласе вершӧр келшен. Какшанын Юлыш йоген пурымаште яллан тӱҥалтышым ыштен. Садланак дыр Какшамарий ялыштына Матюк полко урем уло да Матюков фамилиян кугу тукым ила».
Ангелина МАТЮКОВА.
Звенигово район.
