Еш. Аван шомакше, кечыла шыргыжалмыже чоным ырыктат, ачан мутшо у кӱкшытыш шуаш, йӧсым сеҥен лекташ тарата. Но тӱрлӧ амаллан кӧра кажне йочалан ача-аван шокшыштым шижын илаш пӱрен огыл. Южо пӧръеҥ ден ӱдырамашланат Юмо изи падырашым огеш пӧлекле. Тыгак ойлаш лиеш Морко район Кораксола ял гыч Губерновмыт еш (снимкыште) нерген.
Усталык шӱлышан улыт
Евгений Александрович ден Лариса Максимовна латкуд ий куан ден ойгым лош пайлен илат. Суртоза – Кугу Шале тӱвыра пӧртыштӧ директор. Пелашыже И.С.Палантай лӱмеш тӱвыра да сымыктыш колледжыште туныкта да тунемме тӧнежын тӱшкагудыжым вуйлата. Пиаллан чыла уло, но икшыван лияш пӱралтын огыл улмаш. Садлан вате-марий, икте-весе дене кутырен келшен, икшывым ашнаш налаш кумылаҥыныт.
Елена Косаревам 2016 ийыште кум ияш улмыж годым ешыш конденыт. Кызыт ӱдыр Йошкар-Оласе 2-шо номеран школышто кудымшо классыште тунемеш. Физкультур, руш йылме, лудмаш, ИЗО уроклаш поснак куанен коштеш. Лена И.С.Палантай лӱмеш тӱвыра да сымыктыш колледж пеленысе йоча сымыктыш школышто ешартыш шинчымашым налеш. Эн ондак кӱсле дене шоктен, вара – шиялтыш дене. Но йӧсырак чучын, садлан мураш тӱҥалын. Кызыт фортепиано дене шокташ тунемеш.
Кум ияш Карина Ершова 2018 ийыште у ешыш ушнен. Ӱдыр ты школыштак нылымше классыште шинчымашым пога. Музык, ИЗО, физкультур уроклам моткоч йӧрата.
Лена ден Карина коктынат артист койышан улыт. Усталыкыштым вияҥдаш Йошкар-Оласе «Воштончыш» образцовый музыкально-драматический театрын «Изи воштончыш» спутник театрышкыже коштыт. Тушто марла яндарын мураш, моторын кушташ тунемыт. «Реве» йомакыште Лена тӱҥ рольым, Ревым, модын, Карина Тылзе лийын. «Тумна ден Рывыж» спектакльыште коктынат Шогертенын образшым чоҥеныт.
Пырляште – куан
Пашалан кӧра йоча-влак авашт дене ачашт деч тораште илат. Но каныш кече, каникул, отпуск годым эре Кораксола ялыште канат. Але Лариса Максимовнан шочмо Шеҥше селашкыже вашкат.
– Ялыш каена манам гын, ӱдырем-влак моткоч йывыртат. Карина вольыклан пеш шӱман, чыланыштым айдеме семын йӧрата. «Кугу лиямат, шуко вольыкым ашнаш тӱҥалам», – манеш. Лида акам деке мийымекат, сурт сомылкам ышташ эре полша. А Лена вольык деч лӱдеш. Ялыште сай. Йырымваш пӱртӱс, яндар юж. Кумыл утыр нӧлталтеш. А тичмаш еш пелен лиймым нимо дене от таҥастаре, – ойла ава.
Кеч-могай пайремым еш дене пайремлат. Йоча-влак ачааваштлан пӧлек шотеш сӱретым але поделкым ямдылат. Шочмо кечыштым моткоч вучат. А Евгений Александрович ден Лариса Максимовна нунын пиалышт верч чыла ышташ ямде улыт. Тыгак Губерновмыт еш дене марий концертыш, пайремыш, театрыш кошташ йӧратат.
Шке икшыве семын
– Еш – тиде, кунам йочан чыла уло: ача, ава, шольо-шӱжар, ака-иза. Кажне икшывын шочмо ача-аваже уке гынат, вес еҥ чон шокшыжым пӧлеклышаш. Кеч-кӧнат «авай, ачай» манын ойлымыжо шуэш. Ӱдыр-влакым ашнаш налмеке, нуно вигак «ача», «ава» манаш тӱҥалыныт. Шке икшывем огытыл манын, вигак умылтаренам. Кугу лиймекышт, еҥ деч пален налыт гын, чонышт чот эмгана, ты татым илен лекташ йӧсӧ лиеш, шонем. Но ме нуным шке икшывына семынак йӧратена, нунын пиалан ончыкылыкышт верч чыла ыштена, вий-куатнам огына чамане, – ойла Лариса Максимовна.
Христина АЛЕКСАНДРОВА.
Фотом еш архив гыч налме.
