Волжский район Мучашъер ялыште усталык шӱлышан, чолга Кудрявцевмыт еш (снимкыште) ила. Тудо 2020 ийыште «Идалыкын ешыже» всероссийский конкурсын «Йӱлам аралыше» таҥасыштыже сеҥышыш лектын. Ача-ава-влак марий калыкын тӱвыраже, йӱлаже дене икшывыштым изинек палдарат, кидпашалан шӱмаҥдат.
Алексей Леонидович ден Екатерина Арсентьевна 20 ий утла икте-весылан эҥертен, вашла пагален илат. Суртоза ик предприятийыште телемеханик-инженерлан пашам ышта, озавате – районысо клуб системын, Олыкъялысе З.Ф.Прохоров лӱмеш тоштерын вуйлатышыже. Нуно вич икшывылан ош тӱням пӧлекленыт.
Вич шӱдыр
Эн кугужо – Андрей – Волгатехын «Мехатроника и робототехника» специальность дене 3-шо курсын студентше. Яра жапыште «Кречет» клубышто ондакысе рыцарь семын керде дене кредалаш тунемеш. Егор Марий кугыжаныш университетыште 1-ше курсышто шинчымашым пога. Тудо англичан да немыч йылмылам келгын шымла. Интернет полшымо дене фокусым ончыкташ тунемын. Йошкар-Оласе уремыште калыкым куандара. Кумшо икшыве – Софья – Шарача школышто 8-ше классын тунемшыже. Школысо да районысо конкурслаште мастарлыкшым ончыкта. Кушташ йӧ-рата. Физике, математике, руш литератур, обществознаний, историй предметла дене олимпиадыште уш-акылжым терга. ™маште обществознаний дене районысо олимпиадыште 1-ше верыш лектын. Павел 5-ше классыште шинчымашым пога. Рвезе компьютерлан шӱман. Кугурак изаже-влак деч шукылан тунемеш. Эн изи икшыве – Мирон. Отымбал школын 1-ше классышкыже коштеш. Сӱретлаш йӧрата.
Пу гыч – пӱкен, саргурал
Ӱдыр-рвезе-влак ача-аван ӱшанле полышкалышыже улыт. Алексей Леонидовичын ик эн йӧратыме сомылжо – пу гыч тӱрлӧ арверым ыштымаш.
– Тидлан школ жапыштак кумылаҥынам. Кызыт пӱкеным ыштем. Мыланем пу гыч келыштарыме арвер-влакым кучылташ келша. Нуно чоным ырыктат. ™пшышт могай! Пӱкен-влакын йолыштым ойыртемалтшым ышташ тыршем, сӱрет дене сӧрастарем, – ойла суртоза.
Пу гыч пӱчкедаш эргыже-влакым туныкта. Кызыт телефоным шындаш келшыше подставкым шонен луктыныт. Павеллан мотор саргуралым ыштеныт. Рвезе уремыште тудын дене куанен модеш.
Марий йӱла ила
Екатерина Арсентьевна ден Софья сурт сомылкам пырля тӧрлатылыт. Кидпашаланат жапым муыт: крючок дене пидыт, ургымо машина дене ургат, ырес дене тӱрлат. Ава йоча-влакым марий тӱвыралан изинек кумылаҥда:
– Тоштерыште марий калык дене кылдалтше ятыр фильмым войзена. Шукерте огыл Шорыкйоллан музыкальный комедийым ямдыленна. Софья тушто тӱҥ рольым модын. Шошым еш дене Агавайремыш лектына. Моло пайрем йӱла денат палдарена. Ял калык дене марий пайрем-влакым эртарена.
Моло калык-влакын йӱлашт, тӱвырашт денат палыме лийышт манын, Кудряв-цевмыт кажне ийын тӱрлӧ кундемышке лектын коштыт. 2019 ийыште Архангельский областьыште верланыше Соло-вецкий монастырьыш миеныт, ӱмаште – Волгоград олашке. Тыге йочан тӱняумылымашыже кумдаҥеш.
– Айдеме ош тӱняшке арамлан огыл толеш. Кажнылан икгай мастарлык огеш пуалт, садлан йочан усталыкшым жапыштыже ужын шуктыман да вияҥашыже йӧным ыштыман, – ойлат ача-ава.
