Игече кызыт пылан шога, йӱрат шыжа… Коклан кече ончалеш, шонанпылат мемнам куандара. Шонанпыл тӱсан еш дене вашлияш амал лекте. Марий Турек район Тат-Китне гыч Альбертина Альбертовна ден Александр Альбертович Васильевмыт куд йочам ончен куштат. Шымше икшывым куанен вучат. Айста тиде еш дене лишкырак палыме лийына.
Шыгыр гынат, пырляште сай
– Мемнан ешыште марий шӱлышан икшыве-влак кушкыт. Икте-весе дене марла кутырена. Кугурак эргына, Анатолий, Йошкар-Олаште Радиомеханический техникумышто тунемеш. Вес ийын дипломым налеш. Стас эргына – кидпашалан мастар еҥ. Тудо пум, кумыжым тӱрлӧ семын пӱчкедаш йӧрата. Ончыкылык профессийжымат тидденак кылден. Аня 8-ше классыште тунемеш, аван эн тӱҥ полышкалышыже, изирак ньога-влакым он-чаш полша. Вера – 4-ше классын тунемшыже. Уремыште йолташыже-влак дене яра жапым эртара. Книгам лудаш йӧрата. Лилия ӱдырна 2-шо классыште тунемеш. Школыш кажне кечын куанен куржеш. Куд ияш Игорь школ пеленысе йочасадыш коштеш, – ойла ава.
Ава – кече, ача – кава
Йоча-влакышт шонанпылын тӱрлӧ тӱсшӧ улыт. Кажныже шым тӱс гыч иктыжым ушештара. Тиде еш нерген лач тыгай таҥастарымаш ушышкем пурыш.
Анатолий – ужар тӱс. Тиде тӱс кеҥежымсе пӱртӱсым ончыкта. Анатолийын шочмо кечыжат кеҥежым. Койыш-шоктышыж дене рвезе шыма, ласка. Йошкар-Ола гыч мӧҥгыжӧ толмыж годым тудо ача-аван эн кугу полышкалышыже.
Станислав – йошкар тӱс. Молан манаш гын тудо илышым «тура», шке семынже ужеш. Тунеммаште, пашаште чыла радам дене ышташ тырша, весе деч полышым ок йод. Арам огыл ойлат: «Йошкар тӱс – командирын тӱсшӧ».
Анналан нарынчалге тӱс келша. Тиде тӱс пайремым ончыкта. Аннат лач тыгаяк: йоча-влаклан тӱрлӧ оҥайым шонен луктеш да пырля модашат тореш огыл.
Вералан шемалге-канде тӱс келшен толеш. Тудо романтике шӱлышан ӱдыр кушкеш. Пеледышым, пӱртӱсым сӱретлаш йӧрата.
Лилия – саре. Тыгай тӱсан лилий пеледыш уло. Тиде тӱс куаныше да весела айдемылан келшыше. Лилия лач тыгай койыш-шоктышан кушкеш. Тудым кечшудын изи пеледышыж дене таҥастарыме шуэш.
Игорь – канде тӱс. Изи гынат, рвезе патырлык, эрык вийже дене ойыртемалтеш. Кугурак изашт олаште улыт гын, Игорь – ачан эн кугу эҥертышыже. Пум пурта, изи ведра дене вӱдымат нумалеш. Ачаже тудым изинек пашам йӧраташ, кугурак-влакым пагалаш, изирак-шамычым чаманаш туныкта.
Тӱрлӧ тӱсан улыт гынат, ваш-ваш полшен, эҥертен илыше Васильевмыт ешлан (снимкыште) изи чукайым сайын вашлияш да сай айдемым ончен кушташ тыланена. Тудлан могай тӱс келшен толеш гын?
