«Пий – айдемын эн ӱшанле йолташыже» манмым чӱчкыдын колына. Туге гынат ялысе да оласе уремлаште суртдымо пий-влакым южгунам ужына. Нуным озашт молан луктын колта? Ныл йолан йолташ-шамычын пӱрымашышт нерген огыт шоно мо? Нуно ончыкыжым кузе илаш тӱҥалыт? Нине йодыш-влак чоным тургыжландарат. Куандара, республикыштына поро еҥ-влак улыт, шагал огыл приют пашам ышта. Тидын да моло нерген Оршанке районысо «Динка» пий приютын директоржо Е.А.СОКОЛОВА дене мутланышна.
– Елена Андреевна, тендан приютышко пийым конден кодаш лиеш?
– Ме суртдымо пий-влак дене утларак пашам ыштена. Приютыш толаш да ныл йолан йолташым конден кодаш ок лий. Кажне еҥ суртышкыжо пийым ашнаш налеш гын, тудлан мутым кучышаш, йӧратен ончышаш.
– Приютышто могай пий-влак илат?
– Мемнан дек уремыште кучымо пий-шамыч логалыт. ™маште 250 наре пий суртым муын. Ме стерилизацийым, вакцинацийым эртарена. Нуным пӧрт деч посна огына кодо, клеткылаште ашнена. Садлан, мутлан, мопс ден чихуахуам ончаш йӧнна уке.
– Шуко пийым ашнеда. Тыланда полышкалыше-влак кӱлыт, очыни.
– Кӱлыт. Нуно соцкыллаш, увер оҥалаш приютышто илыше пий-влак нерген уверым вераҥден кертыт. Тыгак мыланна тӱрлӧ эм, кочкыш, шӱк мешак, шӱяш (ошейник) да молат кӱлыт. Иктаж-могай паша дене полшаш кӱлеш гын, соцкылысе лаштыкыште увертарена. Приютышто кажне шуматкечын уна кече эртаралтеш. Кумылан-влак пийым эрыкыш лукташ полшен кертыт. Тыге ныл йолан йолташ-шамыч еҥ дене кылым муын мошташ тунемыт. Пелен йоча-влакымат налаш лиеш. Нуным суртвольыкым, янлыкым йӧраташ изинек туныктыман.
– Тендан деч пийым кузе налаш лиеш?
– Соцкыллаште мемнам муын, возыман але йыҥгыртыман. Приютыш толмеке, келшыше пийым ойырыман да мӧҥгӧ наҥгайыман. Закон дене келшышын, у оза дене договорым ыштена.
Кажне пий суртан лийшаш
