Самырыклан уло ӱшан

24-27 июньышто Йошкар-Ола воктенысе Якимово ялыште верланыше «Кумыс.ру» турист комплексыште самырык автор-влаклан «Кеҥеж сылнымутчо-2021» литератур семинар лийын. Тудым «ВийАр» тӱвыра да келшымаш кыл мер ушем РФ Президент грант-влакын фондыштын полышыж дене эртарен. Проектым Мер каҥашын оналмашыже Алена Иванова вуйлата, авторжо – поэтессе Зоя Дудина.

Семинарыш Марий Эл Республикын районлаже, Йошкар-Ола, Моско, Озаҥ, Нефтекамск олала, Мордовий гыч самырык еҥ-влак чумыргеныт. Тенийысе семинарын программыже поян лийын. Уста еҥ-влакын проектыштым илышыш шыҥдараш киностудий, йӱкым возышо, литератур, театр студий-влак полшеныт. Кинорежиссёр, сценарист Н.Степанова фильмже-влакым ончыктен да тудым войзымо паша дене палдарен. Участник-влак чуваш писатель Р.Сарби дене вашлийыныт. Наталья ден Виталий Курдрявцевмыт мастер-классым эртареныт.

Семинарышке школышто тунемше-влак ушненыт: Оршанке район Кугунур школ гыч Ксюша Черёмушкина ден Диана Богданова, 1-ше номеран Шернур школ гыч Дима Веденькин, Параньга район Матародо гыч Вилена Гордеева. Нуно сылнымутышко икымше ошкылым ыштат.

Х.АЛЕКСАНДРОВА.