Кеҥеж, чевер кеҥеж, тый шокшо игечылан, тӱрлӧ тӱсан чиялан веле огыл, емыж-саскалан, пакчасаскалан поян улат! Сад-пакчашке лектын, тамле пушым шижын, мӧржымат, эҥыжшымат тамлен ончымо шуэш. Но нуно идалык мучко мемнам куандарен огыт керт. Юалге шыжым я йӱштӧ телым кеҥеж пагытым шарналташ манын, кажне гаяк ешыште вареньым, компотым шолтат, киярым, помидорым шинчалтат, тӱрлӧ салатым ямдылат. А Волжский округ Нурсола гыч Марина ден Александра Степановамытын (снимкыште) пӧртйымалышт банке дене темын.
Ӱстембакышт ончалат гын, шинчат шарла: вишне, пуншоптыр, эҥыж, шемшоптыр, ошшоптыр, сливе, тибет эҥыж, голубике, олма, кияр, помидор, шере пурыс. Чылажат Степановмытын пакчаштышт кушкын. А банкысе компотшым, вреньыжым, салатшым ужатат, шӱвылвӱдет йога!
Моло ӱдыр-влак телефон, компьютер ончылно жапым утларак эртареныт гын, Марина ден Сашааваштлан, чолга, уста озавате Надежда Евгеньевналан, полшеныт. Эн ондак саскам погеныт, мушкыныт, вареньым, компотым шукыжым шкеак шолтеныт.
— Компотым шемэҥыж, йошкар, ошшоптыр, вишне, апельсин але лимон да пӱртньык, базилик да лимон гыч ямдылена. Чылаже 80 банке! Эше ломбыгичке гыч ышташ чон йӱла. Шемшоптыр, олма да эҥыж гыч вареньым йӧратена. Кияр ден помидорымат шинчалтена, тений тӱрлӧ лечом ямдылаш кумыл уло. Ятыр емыж-саскам кылмыкташ оптенна. Телым ӱдыр-влак торык да ӱмбал дене кочкаш йӧратат. Лум луммо, поран ӱштмӧ годым шинча ончылно уэш сылне кеҥеж пагыт сӱретлалтеш, — ойла Надежда Евгеньевна.
Сад-пакчаште ятыр емыж-саска шукертак шуын да шочмым чарнен. Но Степановмытын тамле кеҥежышт умбакыже шуйна. Нуно ий еда дыньым, арбузым шындат. Вашке нуным тамлаш тӱҥалыт.
Христина АЛЕКСАНДРОВА.
Фотом еш архив гыч налме.
