Ава, авай, авий… Тудын деч шерге, лишыл еҥже тӱняштыжат уке. Аван порылыкшым, ныжылгылыкшым, лӱддымылыкшым нимо дене висаш огеш лий. Тудын шокшыжо кажне еҥлан сита. Ава – сӱретче: илышнам тӱрлӧ тӱсан чия дене чиялта. Тудлан кӧра мыланна йомакыште илыме гай чучеш. Эн шерге еҥ – герой. Ава икшывыже верч тулыш, вӱдыш пура. Кушеч чыла шукта? ӧраш веле кодеш. Марий Турек район Лоп ялыште илыше Васинкинмыт ешыште озавате Светлана Вячеславовна лач тыгаяк. Шочшыжо-влак, Росина, Ростислав, Аделина, таза, пиалан, ушан кушкышт манын, чыла ышташ ямде.
– Авана эн мотор, эн поро. Тудын шомакше кеч-могай ойгым шулдара. Нелылык лекме годым эре полша. Кочкаш могай тамлын ямдыла?! Мыланна илышым пӧлеклымыжлан – кугу тау, – ойлат икшывыже-влак.
Васинкинмыт ешыште ик касат сылне марий муро деч посна огеш эрте манаш лиеш. Ростислав гармоньым кидышкыже налешат, парняже-влак модыт веле.
– Модыш семӱзгарым изиж годымак налын пуэнна. Ростиславын сылне семым луктын моштымыжым шекланен шуктымеке, коваже чын гармоньым пӧлеклен, – ойла Светлана Вячеславовна.
Ава мурылан шӱман. Тудым ончен, икшывыже-влак тунемыт. Росина ӱдыржӧ Арбор школын 5-ше классыштыже шинчымашым пога. Марла мураш, кушташ кумылан. Мастарлыкшым тӱрлӧ конкурсышто ончыкта да сеҥышыш лектеш. Кидпашам ышташ йӧрата. Сумкам, ӱстелшовычым пидеш. Фоамиран гыч мотор пеледыш аршашым ышта. Кок ияш Аделина акажым тӱткын онча, пуйто тудат полшынеже.
Авашт марий тӱвыра дек шӱмаҥда гын, ачашт Андрей Андриянович – спорт дек. Тудо тале спортсмен: кеҥежым куржталыштеш, телым ече дене пикшла чыма. Яра жапыште пӱртӱс лоҥгашке еш дене лектыт. Ача-ава йоча-влак таза кушкышт манын веле огыл азапланат, шочмо кундемын моторлыкшым ужын мошташ туныктат. Ростислав ачажын корныжым тошка. 2-шо классыште веле тунемеш гынат, 33 медальже уло. Васинкинмыт моло еш-влакланат примерым ончыктат. Школышто эртаралтше «Ава, ача да мый – спорт еш» конкурсышто 1-ше верыш лектыныт.
Тек ешыштышт усталык шӱлыш да таза илыш-йӱлам кучымаш ончыкыжымат озаланат да нуным кугу сеҥымашке шуктат.
