2 апрельыште Москошто литератур дене Всероссийский олимпиадын пытартыш йыжыҥже эртаралтын. Тушто элнан 84 регионжо гыч 309 тунемше уш-акылжым терген. Йошкар-Оласе Т.В.Иштрикова лӱмеш «Синяя птица» гимназийын 10-шо классыштыже тунемше Александра ЛЕСИКОВА Марий Элын чапшым арален да сеҥыше-влак радамыш лектын. Олимпиаде кум тур гыч шоген.
– Кокымшо турын заданийже-влак моткоч неле лийыныт. Кумшо турышто историй дене кылдалтше йодыш-влак логалыныт. Вуйым чот пудыратылаш пернен. Мыланем ис-торий урокышто налме шинчымашем полшен. Гимназийыште гуманитарный дисциплинылам туныктышо-влаклан – кугу тау, – ойла Александра.
Тунемше-влакын всероссийский олимпиадыштын пытартыш йыжыҥже 24 предмет дене Российын лу регионыштыжо 30 апрель марте эртаралтеш. Марий Эл гыч 21 тунемше 21 предмет дене шинчымашыжым терга.
