Кажне школ – шкешотан кугыжаныш. Советский районысо Кельмаксола школ нергенат лач тыгак ойлаш лиеш. У тунемме ийыште 102 йоча парт коклашке шинчын. Тышечын шым тунемшылан оҥгыр йӱк икымше гана йоҥгалтын. 15 туныктышо тӱрлӧ предмет дене келге шинчымашым пуа. Ты уста коллективым Т.Н.Рябинина вуйлата.
– Школ илыш дене тӧр ошкылеш: 6-шо, 7-ше да 9-ше класслаште тунемше-шамыч «Юнармий» толкынын еҥже улыт. У тунемме ийыште агротехнологий классым почынна. Тушко 8-ше классыште шинчымашым погышо ӱдыр-рвезе влак ушненыт. Марий йылме ден тӱвырам аралымылан кугу тӱткыш ойыралтеш. Тунемше-шамыч марий йылме дене регион-влак кокласе олимпиадыште ий гыч ийыш сеҥышыш лектыт. 11-ше классым тунем пытарыше Дарья Загайнова марий йылме дене олимпиадыште кӱкшӧ лектышым ончыктымыжлан Марий Эл Республик Правительствын грантше дене суапландаралтын. Марий йылмым да литературым туныктышо И.В.Караваеван тыште надырже моткоч кугу. Йоча-шамыч «Ямде лий» газет дене пеҥгыде кылым кучат: подпискым ыштат, возкалат, юнкор радамыш ушнат. Шочмо кундемым шымлыме пашалан ятыр жапым ойырена, – ойла директорын алмаштышыже А.Н.Рассолова.
Йоча-шамыч чолга улыт. Тидым вашлиймаш годым шкеак ужна. Мутланымашке кумылын ушнат, пӱсӧ уш-акылан улмыштым модышлаште пеҥгыдемдышт. 4-ше классыште тунемше-влак илалше еҥ-шамычлан пӧлеклалтше мурым мурышт. 2-шо класс гыч Сава Иванов «Шыже» почеламутым лудын пуыш. Кугурак класслаште шинчымашым погышо йоча-влак шочмо ялышт нерген каласкалышт. Николай Царегородцев (8-ше класс) Руясолаже нерген легендым ойлыш. Вашлиймаш деч вара шарнымаш пырдыжым ончышна, школ тоште рыште лийна. Ӱшанена: Кельмаксола школ дене пеҥгыде вашкылна умбакыжат вияҥеш да юнкор-влак серышышт дене лудшына-шамычым куандараш тӱҥалыт.
Катя СЕРГЕЕВА.
Авторын фотожо.
