Изирак ялласе школлаште кызыт оҥай сӱретым вашлияш лиеш: ик классыште 3-4 йоча але шагалракат тунемеш. Кужэҥер район Ӱштымбал школышто 6-шо классыште кум тунемше шинчымашым пога. Тиде Даша Сидыганова, София Мустаева да Кирилл Сидоров. Ӱдыр-влакым снимкыште ужыда. «Мыланна тунемаш келша, – ойлат Даша ден София. – Нимыняр йокрок огыл. Келге шинчымашым налаш утларак йӧн уло. Туныктышо-влак кажныланна тӱткышым ойырен шуктат. Мӧҥгысӧ пашамат эре ыштыман. Кажне урокышто вашмутым пуаш ямде лийман». Кум тунемше келшен ила, мероприятийышкат эре ушна. Даша сылнымутлан шӱман: почеламутым сылнын лудеш, конкурслаште усталыкшым терга. София сӱретлаш йӧрата, мастарлыкшым Кужэҥер посёлкысо Йоча сымыктыш школышто вияҥда. Кирилл – тале спортсмен, школын чапшым таҥасымашлаште арала.
Людмила ГРИГОРЬЕВА.
Авторын фотожо.
