Параньга район Усола ялысе книгагудышто лудшо-влакым Ж.С.Афанасьева вашлиеш. Йошкар-Оласе И.С.Палантай лӱмеш тӱвыра да сымыктыш колледжыште библиотекарьлан тунем лекмеке, Усола кундемыш толын. Тылеч ончыч книгагудышто ава лийшыже Вера Григорьевна тыршен.
– Жанна Сергеевна, лудаш кумылан-влак шукын улыт?
– Лудшына ятыр уло, утларакше – йоча-влак. Нуно школ программе почеш веле огыл, тыгак моло рушла, марла произведенийлам лудыт. Газет ден журнал-влакым шергалыт. Ме Усола школышто тунемше-влак дене пеҥгыде кылым кучена. Шуко лудшо, конкурслаште чолгалыкым ончыктышо-влаклан чапкагазым ямдылена.
– Те лудаш веле огыл, йоча-влакым тӱрлӧ ушемыш кошташ кумылаҥдеда.
– Книгагудо – келшымаш пӧрт. Тышке толшо кажне йоча жапым пайдалын эртарен кертеш. «Йомакым йӧратыше» ушемыш коштшо-влак дене книгам йӱкын лудына, модына, викториным эртарена, кроссвордым, ребус-влакым ямдылена, туштым туштена «Изи чинче-влак» кутко гай пашаче улыт. Поделкым ыштат, тӱрлат, ургат. Тӱрлӧ тӱсан кагаз кидешышт пеледышыш савырна, куэм гыч курчак шочеш. «Пӱртӱсым йӧратыше» ушемыште ӱдыр-рвезе-влак дене пӱртӱсым шижын мошташ, аралаш, сылнештараш тунемына. Йоча-шамыч дене пушеҥгым, пеледышым шындена, шӱкым эрыктена, экскурсийыш пырля коштына. Мемнан кундемыште шочын-кушшо серызе-влакын сылнымутыштымат ӧрдыжеш огына кодо. Надежда Никитинан, Римма Кудрявцеван, Юрий Рязанцевын, Михаил Якимовын почеламутыштым сылнын лудына. Возаш кумылан ӱдыр-рвезе-влакым «Кӱдыроҥгыр» юнкор кружокыш шукерте огыл угыч чумыренам (2018 ийыште пашам ыштен). Шочмо йылмын моторлыкшым почын пуаш туныктем. Йоча-влак пӱртӱс, ача-ава, еш нерген возат. «Ямде лий» газетыште заметкыштым ужмеке, сераш кумылышт утларак лектеш.
– Марий калыкын эртыме корныжо ынже мондалт манын, могай мероприятийым эртареда?
– «Марий вургем пайремышке ӱжеш», «Фольклорым лудына» конкурслаш кажне ийын шукырак да шукырак йоча ушна. Пырля мурена, калык модыш дене модына. Марий Талешке кече, Рошто, Ӱярня да моло пайремымат рӱжге, веселан эртарена. «Шочмо йылме арня» йӱлаш пурен. Мероприятийла гоч йоча-влак шочмо калыкын тӱвыражым, йылмыжым, чон поянлыкшым келгынрак шижаш тунемыт.
