Йошкар-Оласе Бауман лицей пеленысе «Лира» йоча сымыктыш школын «Узоры» йоча образцовый ансамбльже (снимкыште) Китайыште, Циньхуандао олаште, лийын. Тушто «Золотая площадь» тӱнямбал фестиваль эртаралтын. Тушко Российын 30 регионжо гыч 70 утла усталык коллектив ушнен, 2000 наре еҥ погынен. Марий Элын тӱвыраж дене йоча ансамбль палдарен. Фестиваль тӱрлӧ вашлиймашлан, мастер-класслан, ярмиҥгалан, калык вургем пайремлан поян лийын. Уна-влак китай тӱвыра дене палыме лийыныт, Пекин олан моторлыкшо дене кугешненыт.
«Узоры» ансамбльын участникше-шамыч чыла мероприятий ден конкурслашке ушненыт. Икмыняр номинацийыште лауреат лийыныт.
Тыгай фестиваль самырык тукымым лишкырак палымым ышта, келшымашым вияҥда, Шочмо эл, тӱвыра, йӱла, калык дене кугешнаш тарата.
А.С.РЕЧКИНА, «Лира» йоча
сымыктыш школым вуйлатыше.
Фотом ансамбльын архивше гыч налме.
