Кидешышт пу илана

 Марий калык кидпашалан ожнысек уста: шун гыч мастарын      ненча, кӱртньым моштен тапта, пу гыч могай гына арверым огеш ямдыле. ™стел, пӱкен, совла, кӱмыж, окнасерга да молат пу гыч ыштыме лийыныт. Тылеч посна кайыкым, янлыкым пу гыч пӱчкын луктыныт. Нуно суртым сӧрастарен веле огытыл, осал вий дечат араленыт. Мутлан, вуйволакеш имньым пижыктеныт. Тудо пӧртын, ешын, тукымын пиалан илышыштлан мутым кучен. Марий-влак кызытат пу гыч тӱрлӧ арверым ямдылат. Тидлан самырык тукымымат кумылаҥдат. Тыгай суапле сомылым Медведево районысо йоча усталык пӧртыштӧ А.А.Абатин (снимкыште – йоча-влак дене) шукта.

А.Абатин эше школышто тунеммыж годымак киндеркым, изи шондыкым, книга шӧрлыкым, пӱкеным, тумбычкым ыштен. Пум пӱчкедыше мастар, сӱретче Геннадий Куликов дене палыме лиймекше, утларак кумылаҥын. 1994 ий гыч икшыве-влакым туныкта.

Кружокыш 5-11-ше класслаште тунемше ӱдыр-рвезе-влак коштыт. Эн ончыч оҥам пужараш, ягылташ, пум лӱдыкшыдымын пӱчкедаш, лӱмын келыштарыме кӱзым чын кучылташ тунемына. Вара совлам, кочкышым пӱчкедыме оҥам ямдылена. Тидлан пистым кучылтына. Тудо пушкыдо. Арвер-влакат тыгай лийыт, – ойла Андрей Алексеевич.

Рвезе-шамыч пу гыч пӱчкедаш веле огыл тунемыт, тӱрлӧ машинам конструироватлат. Конкурслаш, конференцийлаш ушнен, сеҥышыш лектыт. ™дыр-влакат почеш огыт код. Мутлан, Валерия Криваксина кугу кӱкшытыш шуын. Пум тӱрлӧ йӧн дене пӱчкеден мошта. Тудын кидешыже чылажат илана. Ӱдыр-рвезе-шамычын пашаштым ятыр ончерыште ужаш лиеш.

– Кызытсе илышыште кидпашам тӱрлӧ ма-шина алмаштен гынат, шке ыштыме арвер нимо деч шерге. Тушто – мемнан шонымашна, усталыкна, чонна. Тидым йоча-влаклан умылтараш да ушышкышт курымешлан шыҥдараш тыршем, – ойла Андрей Алексеевич.