Морко посёлкысо Йоча книгагудышто кеҥежымат калык лыҥ. Икшыве-влак книгам лудыт, тӱрлӧ мероприятийыш ушнат. Шукерте огыл «Гений места» ден «Культура для школьников» проектла кышкарыште руш тӱвыра дене келгынрак палдаренна. Йочам ашнаш налше еш-влакын «Родник» клубын да «Движение Первых» толкынын участникше-шамыч шкеныштым чолган ончыктеныт. Йоча сымыктыш школын педагогшо Светлана Русбиевна Дмитриева хохлома тӱр да мезенский сӱретлымаш нерген каласкален.
Хохлома тӱрыштӧ шӧртньӧ, ужар, йошкар тӱсым кучылтыт. Мезенский сӱретлымаш калыкын тӱняумылымашыжым почын пуаш полша. Кажныжым тӱткын ончымо шуэш. Ты технике нерген паленналмеке, йоча-шамыч шкештат сӱретлаш кумылаҥыныт. Кухньышто кучылташ келшыше пу арверлам сӧрастареныт.
Калык тӱвыра – кугу поянлык. Тидым вашлиймашке ушнышо-шамыч раш умыленыт. А кидпаша налме шинчымашым пеҥгыдемдаш полшен.
Виктория ЕМЕЛЬЯНОВА.
Морко посёлко.
Фотом книгагудын архивше гыч налме.
