«Кидпашалан мастар» – тыгай поро мутым кеч-кӧланат колаш куанле. Шке кид дене у арверым ыштен моштышо айдеме молымат ты корныш виктара. Кужэҥер районысо Коҥганур ялыште илыше Анфиса Леухина, акажым, аважым да коважым ончен, кидпашалан шӱмаҥын. Ты ешыште пидме мастарлык тукым гыч тукымыш кусна.
Галина коваже изиракше годым курчак-влаклан тувырым пидаш тунемын. Жап эртымеке, курчак олмеш шке йочажым, вара уныкаже-влакым пидме да ургымо сылне тувырла дене куандараш тӱҥалын. Анфисан аваже – Светлана. Тудат тувырым пидеш. Ава ден кован лывырге кидыштышт вичкыж шӱртын носкиш, шарфыш, пижыш да моло арверыш савырнымыжым шекланыше акажат пидаш кумылаҥын. Кызыт Аделина Оршанке педагогический колледжыште тунемеш да яра жапыште крючок дене тӱрлӧ пушкыдо модышым пидеш. Тудо «Чебурашки СПО для СВО» акцийыш ушнен да салтак-шамычлан изи чебурашке-влакым пӧлеклен (снимкыште). Шӱжаржымат изирак пӧлек дене чӱчкыдынак куандара. Анфисан эн йӧратыме модышыжо – акажын кидше дене ямдылыме пушкыдо курчак.
– Пидмаш пайдале арверым ыштымаш веле огыл, тиде куан ден тыныслыкым кондышо йӧн. Тудо чонлан ласкалыкым пӧлекла. Акамым, авамым да ковамым ончен, усталыкыштлан ӧрам да кугешнем. Нунын семынак ты кидпашалан тунем шуаш шонем, – ойла Анфиса.
Катя СЕРГЕЕВА.
Фотом еш архив гыч налме.
