«Ӱдырамаш – тӱвыран да сымыктышын шепкаже». Профессор Галина Шкалинан ойсавыртышыже тыге йоҥга. Чынак, тӱняште чылалан тӱҥалтышым ава, ӱдырамаш, пуа. Изи ньогалан илышым пӧлекла. Йӧратен да шыматен йол ӱмбаке шогалта, калыкше, йылмыж дене палдара. Ӱдырамашын кидыштыже – волгыдо ончыкылыклан ӱшан. Садлан икшывыже-влакым изишт годымак чын корно дене ошкылаш, поро, шке калыкым йӧратыше да аклыше лияш туныкта.
Звенигово район Кужмарий селаште илыше Татьяна Витальевна Васильева йочам чын ончен куштымын кӱлешлыкшым раш умыла.
– Изиракым чаманен, кугуракым пагален илыман. Ачаавам аклыман. Нуно пеленна улыт гын, ме эн пиалан лийына. Тидым икшывынан койышышкыжо шке примерна гоч шыҥдараш тыршена. Садлан пелашем дене шке ача-авана деке чӱчкыдын уналыкеш коштына, кӱлеш годым полшена, – ойла Татьяна.
Татьяна ден Анатолий Васильевмытын шӧртньӧпадыраш гай кок шочшышт уло. Полина Кужмарий школышто 7-ше «Б» классыште шинчымашым пога. Верысе сымыктыш школышто Нина Арсентьевна Филиппован вуйлатымыж почеш сӱретлаш тунемеш. Кидпашалан кумылан. Фарфор, пластилин гыч ненчаш йӧрата. Мультфильмым войзымаште лектышым ончыкта. Примерым ачаже, уста режиссёр Анатолий Михайлович, деч налеш.
– Полина режим почеш ила. Шуко ум пален налаш, тӱрлӧ конкурсышко ушнаш тырша. Хоббиже-влаклан ме кугу тӱткышым ойырена, полшена, иктаж арвер кӱлеш гын, налын пуэна. Ӱдыр кочкаш шолтен, урген, тӱрлен моштышаш. Изи йоча дене кылым мушаш. Чыла тидлан кече еда туныктем, – ойла самырык ава. – Полина шольыжым ончаш полша. Умбакыжымат коклаштышт пеҥ- гыде кыл лийже, ваш эҥертен, келшен илышт, шонем.
Татьяна Витальевна Кужмарий школышто да верысе йочасадыште ӱдыр-рвезе-влакым мураш туныктен. Кызыт – изи Макар дене декрет канышыште.
Васильевмыт ешыште (снимкыште) жапым пырля эртараш йӧратат. Каныш кечын мӧҥгыштӧогыт шинче, кинош, сийгудыш, модмо рӱдерыш, пӱртӱс лоҥгаш лектын коштыт. Пайремым рӱж пайремлат. Теве 8 Мартыште суртоза ӱдыр-влакым эре пеледыш аршаш дене куандара, ава ден оньаважымат саламла.
