19 октябрьыште Сеҥымашын ХХХ идалыкше лӱмеш тӱвыра полатыште «Угинде» фестиваль-конкурс лийын. Тудым Республикысе марий тӱвыра рӱдер 2014 ий гыч эртара. Тений фестиваль-конкурсыш республикысе тӱрлӧ район гыч шым усталык коллектив ушнен. Нунын коклаште Килемар район Арде селасе тӱвыра пӧртын «Ош пеледыш» йоча фольклор коллективше лийын. Ӱдыр-рвезе-шамыч, Юмылан тауштен, киндын шерге акшым ончыктен, Угинде пайремым веселан эртарыме йӱла дене палдареныт. Кажне коллектив диплом да шергакан пӧлек дене палемдалтын.
