7-11-ше класслаште тунемше ӱдыр-рвезе-влак!
*Те уста, чолга улыда.
*Тунеммашке, школ илышышке вашталтышым пурташ тыршеда.
*Ум пален налаш кумылан улыда.
*Книгам лудаш йӧратеда, сочиненийым чаплын возеда.
*Журналист паша дене палыме лийнеда.
Тугеже, жапым шуйкалыде, Журналистике школыш возалтса: vk.com/kipyatokyo але @kipyatok.yo
«Марийская правда» газетын тӱҥ редакторжо С.А.Дружинин да Бауман лицейын (Йошкар-Ола) директоржо Г.Е.Пейсахович, икойыш шуын, лицей пелен Журналистике школым почыныт. Кызытеш тушко Йошкар-Оласе, республикысе тӱрлӧ районысо школла гыч 40 йоча ушнен. Ӱдыр-рвезе-влак шинчымашым налме дене гына огыт серлаге. Марий Элысе школьник-влакын «Кипяток» у газетыштым тылзе еда лукташ тӱҥалыт. У ий деч ончыч газетын икымше номерже савыкталтын. Тӱҥ редакторын сомылжым Бауман лицейыште 11-ше классыште тунемше Александра Кирпичникова (снимкыште шолаште) шуктен. Сӧрастарыше семын ты лицейынак тунемшыже Мария Губайдуллина (пурлаште) тыршен. Марий Эл Республикысе тӱвыра, печать да калык-влакын пашашт шотышто министр К.А.Иванов Российысе печать кечын ӱдыр-влаклан газетын икымше номержым лукмаште чолган тыршымыштлан Тауштымо мутым кучыктен.
– Ончыкыжым «Кипяток» тӱрлӧ уверым савыктыше газет гына огыл лиеш, – ойлат Александра ден Мария. – Тудо усталыкым вияҥдыше площадкыш савырнышаш. Ӱдыр-рвезе-влак, тӱрлӧ йодышым, школ проблемым лончылен, газетым лудшо-влакым шонымашышт дене палдараш тӱҥалыт.
