Кеҥеж каникул годым шуко йоча базыш але лагерьыш канаш кая. Икшыве-шамыч походыш лекташ йӧратат. Чодыраште тӱрлӧ лӱдыкшӧ вашлиялтеш, кишке дечат шекланыман. Эҥгекыш логалаш огыл манын, тыгай верлаште шкем кузе кучыман? Азапыш логалмек, мом ыштыман? Тидын нерген педиатр Г.А.Чемекова дене кутырышна.
– Йоча-влаклан походышто пеш тӱткӧ лийман. Тӱшка деч ойырлыман огыл. Шкет кодын, палыдыме верыште йомашат лиеш. Аяран кишке шотышто поснак палыман. Тидын нерген кугыеҥ-шамычланат умылтарыман. Кишкым йоҥылыш тошкалат гын, чӱҥгал кертеш. Тудым тӱкалаш але тоя дене вес вере кораҥдаш тыршыман огыл. Кидышкат тӧрштен кертеш. Тек кишке шке корныж дене нушкын кая. Походыш лекме годым аптечке пырля лийшаш.
– Галина Александровна, кишке чӱҥгалмым кузе пален налаш?
– Тыгай годым температур кӱза, давлений волен кая, укшинчыкта, йол кандалген пуалаш тӱҥалеш, шӱлыш петырна.
– Икымше полышым кузе пуыман?
– Аяр кап мучко ынже шарле манын, азапыш логалше еҥ тарваныде кийышаш. Стационарыш наҥгайыме годымат тыгаяк положенийыште лийшаш. Чӱҥгалме вер деч кӱшкырак пеҥгыдын кылдыман. Пуалмыла коеш гын, кылдышым лушкыдемдыман. Сусыр верыш стерильный повязкым пыштыман. Черлылан вӱдым шуко йӱктыман. Туткарыш логалшылан эмлымверыште сывороткым ыштат.
Канышда веселан да пайдалын эртыже манын, пӱртӱсыштӧ чот шекланыман. Кугыеҥын каҥашыжым шотыш налман.
З.ТИМОФЕЕВА.
