Ме визымше классыште шымытын тунемына. Телым кайык-влаклан илен лекташ неле. Нуным чаманена. Садлан мый, Вова, Аделина да Артём кайык ӱстелым ыштенна. Вара чылан погыненна, эше класс вуйлатышына Елена Валериановнам пеленна ӱжынна да Кораксола ял воктенысе чодырашке каенна. Ой, корныжо! Пеш чот луман. Чыланат кыдал даҥыт лумышто почаҥынна. Туге гынат шонымо верышке миен шуынна. Эн мотор куэм ойыренна да шкенан кормушкынам сакенна. Ынде ме уло класс дене кайыкым пукшаш тӱҥалына.
Диана СЕРГЕЕВА.
Морко, Шӱргыял.
