Йочам лудаш изинек кумылаҥдыман. Тудо лудмо гоч шонаш, порылыкым осал деч ойыраш тунемеш. Герой дене пырля куана, ойгыра. Тыге книга лудшын йолташышкыже савырна да акшым нигунам огеш йомдаре. Пошкырт кундем Калтаса район Калмиямучаш ялысе книгагудышто лудшо-влак эре улыт. Вӱдышє библиотекарь Р.Т.Кубатуллина (снимкыште) нуным кажне кечын вашлиеш.
– Раиса Тимофеевна, книгагудышто 32 ий пашам ыштеда. Могай вашталтышым шижыда?
– Ондакысе дене таҥастараш гын, илыш чот ончыко каен. Туге гынат, сомылна тудак кодын: лудаш кумылаҥдаш. Йоча-влакын вашталтмышт палынак шижалтеш. Кызыт телефон, компьютер дене утларак пайдаланат.
– Туге гынат, тӱрлє йєным кучылтын, йоча дене вашкылым ыштеда.
– Книгагудо лудмо да каныме вер лийже манын тыршена. Тышке толшо кажне еҥ чонлан келшыше пашам мушаш. Арня еда могай-гынат мероприятийым эртарена. Акцийлаш ушнена, ончерым келыштарена. Па-триотизм шагатым, шочмо йылме арням эртарена. Марий серызе-влакын лӱмгечышт вашеш произведенийыштым лудына. Йоча-садыш коштшо ньога-влаклан «Зелёный дом» экологий кружок пашам ышта. Кидпашам йӧратыше-шамыч «Хозяюшка» кружокыш коштыт. Кугыеҥ-влак дене пырля ӱдыр-шамыч пидаш, ургаш тунемыт.
– Йоча-влак могай произведенийым утларак лудыт?
– Книгагудышто индеш тӱжем утла книга аралалтеш. 430 лудшына уло. Ӱдыр-рвезе-влак школысо программе почеш произведенийлам утларак налыт. Шкаланышт келшыше уверымат кычалыт. Йомакым, фантастике сынан книгам йӧратыше ятыр уло. «Ямде лий», «Кугарня» газетлам, «Ончыко» журналым шергалыт. Марла книга шуко огыл гынат, йодыт, лудыт. Шкенан фондышто лудшын йодмо книга уке гын, районысо книгагудо гыч кондена. Мыланна кажне лудшо шерге.
Кызыт тӱрлӧ ийготан йочалан келыштарыме мотор сӱретан книга-влак улыт. Лач лудаш гына ӧрканыман огыл.
