Вероника ЧЕМОДАНОВАЛАН У Торъял район Кӱанпамаш ялысе книгагудо кокымшо пєрт гай. Ӱдырым тӱрлӧ мероприятийыште ужаш лиеш. Тудо книгагудо пашаеҥ-влаклан пайремым эртараш полша. Шукерте огыл эртаралтше «Библиотекылан книгам пӧлекле» акцийыш ушнен да «Детские сказки» журналын 53 номержым пӧлеклен.
– Мый йомакым лудаш йӧратем. Авам мыланем «Детские сказки» журналым налеш. Мый тудын кажне лаштыкшым шергалам. Йолташем-влаклан каласкалем да нуным лудаш кумылаҥдем. Мыланем эше «Ёжик» журнал келша. Шоҥшо ден йолташыже-влак чоя ребусым, задачым, лабиринтым, математике дене заданийым темлат. Кагазым пӱчкеден, мотор арверым ыштем. Библиотекыште могай гына книга уке?! Мӧҥгӧ кайымат огеш шу, – ойла Вероника.
