Морко район Кугу Шале ялысе книгагудо лудшылан поян. Лудаш йӧратыше-влак тушто эре улыт. Но чер шарлыме жапыште паша радам вашталтын. Йоча да кугуеҥ-влакым Лилия Сергеевна Владимирова ден Алевтина Николаевна Гурьева вашлийыт. Шке пашам йӧратыше, поро кумылан книгагудо пашаеҥ-влак кажне лудшылан келшыше книгам муаш полшат. Библиотеке пелен йоча-влаклан «Ужар тӱня», «Ӱжара» экологий да краеведений кружок-влак пашам ыштат.
А.Н.Гурьева:
– Ондак библиотеке книгам аралыме вер лийын гын, кызыт книгагудо пашаеҥын сомылжо вашталтын. Тудо шинчалан койдымо манаш лиеш. Интернет йӧным кучылтын, презентацийым ямдылена, ончерымат электрон йӧн дене ончыктена. Шуко книгам интернетыште муаш лиеш гынат, кагаз пушан «илыше» книгам лаштыклаш йӧратыше-влакын чотышт шагалемын огыл. Книгагудышто 16000 утла книга уло. Тений https://vk.com/knigi.sever , https://vk.com/knigidlyasela сайт-влак полшымо дене фонднам ешаренна. Шуко книгам Н.Быкова ден М.Родченкова пӧлекленыт. Нунылан таум ойлена.
Л.С.Владимирова:
– Тӱжем наре лудшына уло. Утларакше – йоча-влак. Нуно школ программе почеш веле огыл, тыгак рушла, марла произведений-влакым лудыт. Газет ден журнал-влакым шергалаш йӧратат. Купсола школышто тунемше-влак дене пеҥгыде кылым кучена. Йоча-влакым тӱрлӧ семын кумылаҥдена. Оҥай ончерым ыштена, тӱрлӧ темылан викториным, мероприятий-влакым эртарена. Йомакым модына, почеламутым лудына, кыдалаш класслаште тунемше-влак дене тӱрлӧ проектым ямдылена, конкурслашке, акцийлашке ушнена. «В окопах Сталинграда» республикысе конкурсышто Диана Старикова 3-шо верым налын, Даша Семёнова, Саша Гурьев да Надя Петухова онлайн викториныште сеҥыше лийыныт.
