Шернур книгагудышто #ЗаДело у проект почеш пашам ыштена. Тений экологий направленийым ойыренна. Книгагудыш коштшо йоча-влак дене ятыр пашам шуктена. Самырык режиссёр, актёр, музыкант, Шернур эрге Денис Шаблий дене икымше вашлиймаш лийын. Сердяжке эҥерын сержым эрыктенна, Сеҥымашлан 75 ий теммылан пӧлеклалтше скверыште шӱкшудым кӱрынна. Йоча-влакым районын эн сай вершӧрлаже: «Лышташан ото-влак» ботанический чапкӱ, Марьян памаш, Лемде эҥер, «Ӱжара» минерал вӱд, «Келшымаш памаш» – дене палдаренна.
Виче кундемыш миен коштмына ӱдыр-рвезе-влаклан кужу жап шарнымашеш кодеш, шонем. Котельнич оласе Динопарк, Палеонтологий тоштер, Виче эҥер, Зараменский курыкпомыш да моло моторлык ӧрыктарыше сынышт дене куандареныт.
Светлана СЕРГЕЕВА, книгагудо пашаеҥ.
