Кугезе ковам Кугу Ачамланде сар нерген ачамлан ятыр каласкален. Ачам – мыланем. Анна ковам Мандык ялеш 1934 ийыште шочын. Тудо тыге ойлен: «Сар тӱҥалме кечын ме модын куржталынна. Калык – пашаште. Шучко уверым ял калык кечывал тура годым веле пален налын. Шуко жапат эртен огыл, ялышке повестке-влакым конденыт. Фронтыш шуко еҥым ужатеныт. Мемнамат ойго ӧрдыжеш коден огыл. Тушман ваштареш кредалаш ачам Илимбай Михайлович Макаров каен. Тудын изаже, шольыжо-влакымат Шочмо элым аралаш наҥгаеныт. Менлыш кугызай икмыняр тылзе гыч увер деч посна йомын. Ачамын Емангул шольыжо Берлин марте шуын. Но сеҥымашым вашлияш пӱралтын огыл улмаш. Танкше минеш пудештын. Ачам сар гыч илыше пӧртылын. Ме, йоча-влак, ӱмбакше кержалтынна, толмыжлан чот куаненна. Тиде пагытым мый пеш сай шарнем».
Сар жапыште илыш чот йӧсӧ лийын. Туге гынат йоча-влак Буймо школыш тунемаш коштыныт. Кагаз ден чернила лийын огыл. Чернилам коҥгасе шем шӱч дене ыштеныт. Комбо пыстылым тушко тушкалтен, тошто кагазлаш, газет лаштыклаш возкаленыт. Шучко сарлан кӧра калыкын шинчавӱдшӧ шуко йоген. Туге гынат совет калык ончыкылык пиалан илыш верч ӱшаным йомдарен огыл.
Вероника МУРЗИНА.
Татарстан, Агрыз, Кӱанэҥер.
Сӱрет нейросеть полшымо дене ыштыме.
