Кок буква – уло тӱня

Еш – поянлык, маныт. А ешыште поянлык – тиде йоча. Звенигово район Памашсола ялыште илыше Марина Борисовна  ден Александр Викторович Валерьяновмыт чынжымак поян улыт.  Нуно   вич икшывым ончен куштат. Кокытшым ашнаш налыныт. Марина тулык да ача-ава деч посна кушшо йоча-влаклан Морко район Октябрьский интернат-школышто тырша. 2018 ий марте воспитатель сомылым шуктен, кызыт книгагудышто тырша. Пелашыже Александр Викторович котельныйыште операторлан ышта.

– Ме эре йоча-влак пелен  лияш тыршена. Пырля пӱртӱсыш лектына, поҥгым, емыжым погена. Каникул, каныш годым Йошкар-Оласе театрыш, тоштерыш коштына, – ойлат ача-ава.

Валерьяновмыт еш суртышто лектын шогышо пашам пырля да писын ышта. Кугу ешыште сомыл эре уло. Ушкалым, лудым, комбым ашнат. Пакчасаскам лыҥ шындат. Эрге-влак мотоблок денат пашам ыштат. Пареҥгым пакча гыч нунак шупшыктеныт. Уло чоным йочалан пӧлеклыше ача-ава йочам чын корныш шогалтыме верч чот тыршат. Изинек еҥым пагалаш, кугуракын мутым колышташ туныктат.

– Ача-ава деч посна кушшо, тулык ӱдыр-рвезе-влак дене тынар ий пашам ыштен, кажныже шкемын икшывемла чучеш, – ойла Марина Борисовна.

Эмиль ден Элина иза ден шӱжар улыт. Нуным эн ончыч мӧҥгӧ каныш кечылан налын. Эмиль ден Элиналан пырляште лияш келшен. Валерьяновмыт жапым шуйкалыде, документым поген, икшыве-влакым ашнаш налыныт. Тыге кок йоча у ешым муын. Эмиль 15 ияш. Тудо Звенигово районысо  Керебеляк школын 9-ше классыштыже тунемеш. Музыкым йӧрата, семым келыштараш тырша. «Икмыняр ий гыч тудын возымо мурым колышташ тӱҥалына чай», – шыргыжеш самырык ава.

Элинат – ты школын тунемшыже, 8-ше классыште шинчымашым пога. Тудо тамле кочкышым ышташ мастар. Каныш кечылаште тутло сий дене уло ешым куандара. Кирилл ден Настя Морко районысо Коркатово лицейыште тунемыт. Эрге изинек техникылан шӱман, ӱдыр врач лийнеже. Эн изиже – София, 6 ияш. Памашсоласе йочасадыш коштеш. Иза ден ака-шамыч деч нимынярат почеш ынеж код, чыла вере шуаш, чыла пален налаш тырша.

Кажне йоча ешыште илышаш. Кажне икшывын ача-аваже лийшаш. Нуно изинек йӧратымашым, пагалымашым, порылыкым шижын кушшаш улыт. Тунам веле илышым умылышо, еҥым пагалыше айдеме кушкыт. Тыгай шонымаш дене самырык мужыр йочам кушта.