Южо йыгыр-влак чылт икгай улыт, весышт ойыртемалтыт. Ача-ава-влак икгай вургемым, йолчиемым чиктат, ик семын йоҥгышо лӱмым пуат. Кажныже шкешотан лийже манын, мом ыштыман?
Калыклан психологий ден педагогике да социал полышым пуышо «Доверие» республикысе рӱдерын психолог- педагогшо Т.СОЛОВЬЁВА (снимкыште) тиде йодышлан икмыняр ой-каҥашым пуа:
– Йыгыр йоча – ик тичмаш, но йӧршын кок тӱрлӧ айдеме. Тӱс дене икгай улыт гынат, койыш-шоктышышт, шинчаончалтышышт дене ойыртемалтыт. Нунылан тӱрлын йоҥгышо лӱмым пуыман. Ача-ава-влаклан вургемым налме шотышто шоналтыман. Чылт икгайым огыл, тӱрлӧ тӱсаным чиктыман. Тыгодым йоча-влакын кумылыштымат шотыш налман. Ача-ава кажныж дене кутыраш жапым мушаш, шонымашыштым пален налшаш улыт. Кажне икшыве тӱрлӧ Мутлан, коктынат ик почеламутымак тунемыт гын, ик семын писын шарнен огыт код. Икте сайын мура гын, весе устан сӱретла. Пӱртӱс нунылан тӱрлӧ мастарлыкым пуэн. Каж-ныжын шке арверже лийшаш. Тыге гына нуно «тыйын» да «мыйын» манмым умылаш тунемыт. Пашашт-лан мутым шке кучышаш улыт. Иктыже осал пашам ышта гын, когыньыштымат вурсыман огыл. Шкешотан икшывым куштынеда гын, каҥаш-влакым шотыш налза.
Йошкар-Ола гыч Милана ден Злата ЛЕБЕДЕВАМЫТ (снимкыште ача-ава дене пырля) кок ийым теменыт. Коклаштышт пеҥгыде кыл шижалтеш. Пырля модыт. Койыш-шоктышышт тӱрлӧ. Злата моткоч писе, Милана ныжылге.
