Шочмо йылмым пагалыше, марий сылнымутым йӧратыше да В.Колумбын поэзийыжым аклыше-влак «Колумб лудмаш» оласе конкурсышто усталыкыштым ончыктеныт. Таҥасымашке тӱрлӧ ийготан йоча-шамыч, студент да туныктышо-влак ушненыт. В.Колумбын сылнымутшым 70 утла участник марий, руш да финн йылмыла дене лудын.
Погынышо-влакым Марий Эл Республикысе Тӱвыра, печать да калык-влакын пашашт шотышто министерствын пашаеҥже А.В.Илларионов, Марий тӱвыра рӱдерым вуйлатыше В.Г.Петров саламленыт. Марий Элын калык писательже З.М.Дудина Колумб лудмашын эртыме корныжым шарналтен.
Марла лудшо-влак коклаште икымше верыш Мария Малинина (Медведево, 6-шо №-ан «Колокольчик» йочасад), Максим Михайлов (Калыкле сымыктыш гимназий), Равиль Игнатьев (3-шо №-ан школ) лектыныт. Поэт-новатор В.Колумбын почеламутшым тӱрлӧ йылмыш кусарыме. Кусарыме почеламутым лудшо-влак коклаште Таисия Шакирова (30-шо №-ан «Берёзка» йочасад), Мария Пуртова (Калыкле сымыктыш гимназий), Эвелина Петухова (17-ше №-ан школ), Баламир Юлдашев (15-ше №-ан школ) ойыртемалтыныт.
Сеҥыше-влак Морко районышто эртаралтше «Колумб лудмаш» республикысе конкурсышто Йошкар-Олан чапшым аралаш тӱҥалыт.
Л.НИКОЛАЕВА.
