Ош йӱксыла койшо мотор марий вургеман ӱдыр-рвезе-влак 21 майыште Республикысе йоча да самырык-влаклан В.Х.Колумб лӱмеш книгагудыш погыненыт. Сылнымутлан шӱман, шочмо йылмын ямжым шижын моштышо коло наре ӱдыр-рвезым «Колумб лудмаш» оласе конкурс иквереш чумырен. Поэтын поэзий саскажым аклыше йоча-влак марий, руш, англичан йылмыла дене почеламутым лудыныт. Пайремым «Падыраш» йоча ансамбль, марий бард-гитарист Г.Григорьев сӧрастареныт.
Йоча-влакын мастарлыкыштым аклаш куштылго огыл гынат, жюри эн тале участник-влакым палемден. Шым ий марте лудшо-влак коклаште 5-ше номеран «Хрусталик» йочасадыш коштшо Мирослав Созонов ойыртемалтын. Йошкар-Оласе А.С.Пушкин лӱмеш 4-ше номеран гимназийын тунемшыже Татьяна Зыкова 8-10 ияш-влак коклаште икымше верыш лектын. И.С.Палантай лӱмеш тӱвыра да сымыктыш колледжын калыкле сымыктыш гимназийжын тунемшыже Максим Фёдоров «11-14 ияш марте» таҥасыште чылам ончылтен. А 15 ияш деч кугурак-влак коклаште Семёновка селасе 21-ше номеран школын тунемшыже Алина Дмитриева сеҥышыш лектын.
Сеҥыше-влак «Колумб лудмаш» регион-влак кокласе онлайн-конкурсышто усталыкыштым тергаш тӱҥалыт.
