Сылне, кечан шыже кечын Коля йолташыж дек унала каяш лектын. Кудалеш, кудалеш, пӱртӱсын моторлыкшымат ок шеклане. Лач тӱрлӧ тӱсан лышташ шинчажым йымыктара. Чот вашка, ятыр уверым намиен шуктынеже. Шижынат ок шукто – удыр рожыш шуҥгалтеш.
– Ой, ой, утарыза! Нимат ом уж! – уло йӱкын кычкыра.
– Мо гын тушто коштеш?! – ӧреш Удыр.
Ӱпшыч ончалеш да ойла:
– Аа, умылышым, умылышым. Коля улат!
– Коля, коля, коля улам, – тутытен-тутынен, чытырен-чыты рен вашешта.
– Сай, сай. Мый дечем куштыл гын от кай.
– Мый моткоч вашкем, колто мыйым, сӧрвалем. Йолташемлан уверым наҥгаем.
– Уке, тыглай ом колто. Кум йодышемлан вашештет гын, кает. Лекташат полшем, – ойла Удыр.
– Йӧра-а тугеже, – кугун шӱлалта Коля.
– Колышт, икымше йодышем тыгай. Тый таче лышташым тошкен-тошкен кудальыч. Палет, нуно шыжым молан йогат?
– Ом пале, – шортын вашешта.
– Йӧра, умылтарем. Шыже велеш лышташыште шуко пайдале да аяр вещества погына. Пушеҥге пайдажым шканже налеш, а аярже деч лышташым йоктарен утла. Вес амалат уло. Мланде йымалне вӱд кылма да пушеҥге вожыш ок логал. А лышташ гыч шыжымат кеҥежымсе семынак шуко вӱд пуча. Пушеҥге, кошкаш огыл манын, лышташыжым йоктара.
– Могай оҥай улмаш. Пален омыл. Йолташем дек миен шуамат, тудланат каласкалем.
– Йӧра, тиде йодыш йӧсырак ыле. Нимат огыл. Кокымшо йодыш куштылгырак лиеш. Шыже велеш кайык-влак молан чоҥештен каят? Кузе шонет?
— Очыни, кочкашышт уке. Эшежым йӱштӧ.
— Чын, кертат! Кумшо йодышем кодо. Туштым туштем. Чевер мундыра укш мучаште кеча.
— Олма? — шоныде вашештыш.
— Чын, олма! Саламлем тыйым! Уш-акылет пӱсӧ. Ынде мый лекташет полшем.
Удыр Колялан кужу тошкалтышыжым шуялта. Коля писын-писын кӱза. Вашкымыж дене теве уэш мӧҥгёш шуҥгалтеш.
Мланде йымач Удыр кычкыра:
— Тетла нигунам ит вашке, вашке паша важык кая!
— Тау, Удыр!
Тылеч вара Коля нер йымакше тӱткын онча, ок вашке. Ӥолташыж дек миен шуын, тудланат пайдале ой-каҥашым пуа.
Алина СУББОТИНА.
2-шо номеран Морко школ.
