Коля ден Удыр

Сылне, кечан шыже кечын Коля йолташыж дек унала каяш лектын. Кудалеш, кудалеш, пӱртӱсын моторлыкшымат ок шеклане. Лач тӱрлӧ тӱсан лышташ шинчажым йымыктара. Чот вашка, ятыр уверым намиен шуктынеже. Шижынат ок шукто – удыр рожыш шуҥгалтеш.

– Ой, ой, утарыза! Нимат ом уж! – уло йӱкын кычкыра.– Мо гын тушто коштеш?! – ӧреш Удыр.

Ӱпшынчеш да ойла:

– А-а, умылышым, умылышым. Коля улат!

– Коля, Коля, Коля улам, – тутынен-тутынен, чытырен-чытырен вашешта.

– Сай, сай. Мый дечем куштылгын от кай.

– Мый моткоч вашкем, колто мыйым, сӧрвалем. Йолташемлан уверым наҥгаем.

– Уке, тыглай ом колто. Кум йодышемлан вашештет гын, кает. Лекташат полшем, – ойла Удыр.

– Йӧра-а тугеже, – кугун шӱлалта Коля.

– Колышт, икымше йодышем тыгай. Шыжым лышташ-влак молан йогат?

– Ом пале, – шортеш Коля.

– Йӧра, умылтарем. Шыже велеш лышташыште шуко пайдале да аяр вещества-влак погынат. Пушеҥге пайдажым шканже налеш, а аярже деч лышташым йоктарен утла. Вес амалат уло. Мланде йымалне вӱд кылма да пушеҥге вожыш ок логал. А лышташ гыч шыжымат кеҥежымсе семынак шуко вӱд пуча. Пушеҥге, кошкаш огыл манын, лышташыжым йоктара.

– Могай оҥай улмаш. Пален омыл. Йолташем дек миен шуамат, тудланат каласкалем, – йывыртен вашешта Коля.

– Йӧра, тиде йодыш йӧсырак ыле. Нимат огыл. Кокымшо йодыш куштылгырак лиеш. Шыже велеш кайык-влак мемнан деч молан чоҥештат? Кузе шонет?

– Очыни, кочкашышт уке. Эшежым йӱштӧ.

– Чын, кертат! Кумшо йодышем кодо. Туштым туштем. Чевер мундыра укш мучаште кеча.

– Олма? – ӧрынрак вашешта Коля.

– Чын, олма!

– Саламлем тыйым! Уш-акылет пӱсӧ. Ынде мый лекташет полшем.

Удыр Колялан кужу тошкалтышыжым шуялта. Коля писын-писын кӱза. Вашкымыж дене теве уэш мӧҥгеш шуҥгалтеш.

Мланде йымач Удыр кычкыра:

– Тетла нигунам ит вашке, вашке паша важык кая!

– Тау, Удыр!

Тылеч вара Коля нер йымакше тӱткын онча, ок вашке. Йолташыж дек миен шуын, тудланат пайдале ой-каҥашым пуа.

Алина СУББОТИНА.
2-шо номеран Морко школ.
Э.Ямбаршеван сӱретше.

  • Related Posts

    Районла кокласе олимпиадыш ушненыт

    Шорыкйол тылзе мучаште Коркатово лицейын тунемшыже-влак районла кокласе олимпиадыш ушненыт. Тыгайже икымше гана лийын. Олимпиаде Звенигово лицейын икымше вуйлатышыже Валерьян Павлович Яковлевлан пӧлеклалтын. 5-6-шо класслаште тунемше шӱдӧ наре ӱдыр-рвезе математике,…

    Спорт пайрем

    Марий Элыште эртыше каныш кечыште «Российын ечыгорныжо-2025» тӱшка таҥасымаш 43-шо гана эртаралтын да спортлан шӱман 10 000 наре еҥым авалтен. Тений тудо Кугу Ачамланде сарыште Сеҥымашлан 80 ий теммылан пӧлеклалтын.…