Кож воктене – Йошкар упш

Марий тӱр дене сӧрастарыме йошкар упшан, мотор корзиҥган ӱдыр марий ёлкышто вигак шинчашке логалын. Тиде Настя Рябинина. Тудо Оршанке район ӧрша школ пеленысе йочасадыш коштеш, йомакым моткоч йӧрата. У ийлан аваже деч Йошкар упшын костюмжым ургаш йодын, а корзиҥгам шке ышташ полшен.

– Мый кампетке кагазым погем. Тушеч шуко арверым келыштараш лиеш. Ончалза теве корзиҥгам. Тӱрлӧ тӱсан кагаз могай мотор сыным пуртен, а кӧргышкыжӧ шере кочкышым пышташ лиеш, – ойла Настя.

Настян тыршымыже арам ли-йын огыл. «У ий чием» номинацийыште 6-9 ияш-влак коклаште икымше верым сеҥен налын.