Медведево район Пекшиксола школын 9-ше классыштыже тунемше Юлиана БЛАГОДАРОВА мурылан шӱман. Яндар йӱкшӧ дене мурым сылнын йоҥгалтарымыжым школышто эртарыме кажне гаяк мероприятийыште колаш лиеш. Мурым йӧратымыже «Леонид Краснов – шӱшпык йӱкан марий мурызо» шымлыме пашам возаш таратен.
– Леонид Красновын илыш корныжым келгын шымленам. Тудын йӱкшӧ моткоч виян да сылне лийын. Опер мурызын йоҥгалтарыме мурыжо-влакым марий йылмым туныктышо Галина Алексеевна Петрова (снимкыште) дене Марий радиошто кычалынна. Леонид Краснов Эрик Сапаев дене пеҥгыде кылым кучен. Икымше марий оперыште Акпатырын рольжым модын. Шӱшпык йӱкан марий мурызо семын мыят мураш тунем-нем, – ойла ӱдыр.
