Историйым ончалаш гын, мемнан элыште пионерий миллион ӱдыр-рвезым иквереш чумырен. Жап эртен гынат, ты толкын икмыняр школышто кызытат уло. Йоча-шамычым Шочмо элым йӧраташ, сайын тунемаш, эре ончылно лияш, пионерын законжым шуктен илаш туныкта. Теве Волжский район Пӧтъял школышто 4-ше классыште тунемше-влакым кажне ийын 19 майыште пионер радамыш пуртат. Ӱдыр-рвезе-влак Совет Ушемын кум гана Геройжо, авиацийын маршалже И.Н.Кожедубын лӱмжым нумалше «Шонанпыл» йоча организацийын ончылъеҥже лияш товатмутым пуат.
– Йоча-влакын оҥышкышт йошкар галстукым пагалыме уна-влак кылдат. Пионер-шамыч товатмутыштым пашашт, тунеммашт дене пеҥгыдемдаш тӱҥалыт, – ойла кугурак вожатый Л.В.Кошаева. – Тунемшына-влак ты лӱмым эре кӱшнӧ кученыт да кучат. Российысе, республикысе тӱрлӧ конкурсышто, спорт таҥасымаште ятыр сеҥымашке шуыныт. Пионер лияш – чап да пиал.
Л.НИКОЛАЕВА.
