Кугезе кочам Сергеев Артемий Иванович (снимкыште) 1915 ийыште Шернур районысо Чисола ялеш шочын. Йоча жапше куштылго лийын огыл, туге гынат тудо кугу тӱткышым шинчымашлан ойырен. Йолымбак шогалаш тӱҥалме жапыште Кугу Ачамланде сар нерген шучко увер толын. Кугезе кочам 1942 ийыште шочмо мландым аралаш каен. Ик тале кучедалмаште пеш нелын сусырген, шым тылзе госпитальыште эмлалтын. Тидлан кӧра тудо ончыкыжым санитар ротым имне дене шупшыктен. 1945 ийыште шӱйышкыжӧ тушманын пуляже толын керылтын. Кочам уэш госпитальыш логалын. Но тидын нерген родо-тукымжылан увертарен кертын огыл.
Вучымо Сеҥымаш кече толын шуын. 1945 ий августышто кугезе кочам мӧҥгыжӧ пӧртылын. Могай кугу куан! Артемий Иванович сар нерген ойлаш йӧратен огыл, садлан ешыштыже тудын деч шукыжым пален налын кертын огытыл. Кочам «За отвагу», «За боевые заслуги», «За победу над Германией» медаль-влак дене палемдалтын. Сар деч вара кугезе ковам дене 13 ий пырля ваш келшен иленыт. 1949 ийыште ковам Галина Артемьевна шочын. Тудым сар деч варасе йӧсӧ жапыште ончен куштеныт. 1958 ийыште, чаманен каласыман, кугезе кочам илыш дене чеверласен.
Мый кажне ийын 9 майыште «Бессмертный полк» акцийыш ушнем. Талешкынам шарналтен, сеҥымашлан тауштем.
Кирилл НОВОСЁЛОВ.
Шернур, Кукнур.
Фотом еш архив гыч налме.
