Кугезе кочам Иван Павлович Кушаков (снимкыште пурлаштыже) 1914 ий Крешене арнян Морко районысо Йошкарэҥер ялеш шочын. Школышто вич классым тунем пытарымеке, ачажлан озанлыкыште пашам ышташ полшаш тӱҥалын.
Кугу Ачамланде сар тӱҥалме жапыште кугезе кочам Моско кундемысе Раменский авиазаводышто пашам ыштен. Шочмо элым аралаш тушеч каен. Моско верч кредалын. Вара сар корныжо Украина, Польша мландыште шуйнен. Икымше Украин фронтын 77-ше батальонжын 334-ше пулемёт отделенийжын командирже лийын. Германий мландыште кредалмыж годым ик тале сӧйыштє фашист взводым пулемёт дене лӱйылтын патырен, 8 фашистым пленыш налын. Ты подвигшылан тудлан Йошкар Шӱдыр орденым кучыктеныт. Сар пытымек, 1946 ийыште мӧҥгыжӧ пӧртылын. Кугезе ковам дене кандаш йочам ончен куштеныт. Ме нунын дене кугешнена.
Ксения БУТЕНИНА.
Морко, Эҥерсола.
