Вараҥыж ял гыч Кугу Ачамланде сарыш 76 пӧръеҥ каен, 34 мӧҥгеш пӧртылын. Нунын коклаште – мыйын кугезе кочам Яков Николаевич Герасимов. Кугезе кочам Кугу Ачамланде сарыш 1942 ий апрельыште каен. Сурокышто ик тылзе связистлан тунемын. Тушеч Ленинградский фронтыш колтеныт. Ик кредалмаште сусырген, Рыбинский госпитальыште эмлалтын. Варажым Волховский фронтыш логалын. Рядовой разведчик лийын.
– 1943 ий февральыште заданий дене каенна. Кум землянкыште улшо тушман-влакым пудештаренна. Иктым, пленыш налын, полкыш конденна, – кугезе ковамлан шарналтен каласкален кочам. – Тиде кредалмаште кудытын сусыргенна. Мыланем госпитальыште операцийым ыштеныт. 1944 ий январь марте эмлалтынам.
Тӧрланымеке, кавалерийский полкыш логалын. Имньым кушкыжын, Молдавийым, Болгарийым, Румынийым да моло элым эртен. Дунай эҥерым вончымо годым кугезе кочам угыч нелын сусырген. Вийым погымеке, стрелковый полкышто пехотный разведчик лийын. Венгрийыште адак сусырген. Днепропетровский госпитальыште эмлалтын. Сеҥымаш кечымат туштак вашлийын.
1945 ий латнылымше июньышто кугезе кочам шочмо ялышкыже толын. Яков Нико¬лаевич «За отвагу» медаль, I степенян Кугу Ачамланде сар орден дене палемдалтын. Мый кугезе кочам дене кугешнем.
Мария ГЕРАСИМОВА.
Морко, Нуж-Ключ.
Фотом еш архив гыч налме.
