Калык йӱлам аралыме да пойдарыме пашашке самырык тукымым кумылаҥдымаш ик эн кӱлешанлан шотлалтеш. Тыгай шонымаш денак «Кугезе вож» республикысе фольклор фестиваль кумло ий наре эртаралтеш.
27 февральыште Морко посёлкысо тӱвыра полатыш Марий Элын 10 районжо ден округшо гыч 250 наре ӱдыр-рвезе погынен. Нуно рефератым араленыт да йӱлам, пайремым модын ончыктеныт. Йоча-шамыч шымлыме пашашт дене оҥайын да тичмашын палдареныт: тошто муро-влакым муреныт, тӱрлӧ семӱзгар дене шоктеныт. Морко район Красный Стекловар гыч Мария Курушина тукымысо муро йӱла нерген каласкален. Тудын пашаже ик эн ойыртемалтшылан шотлалтын.
– Ешнан илышыштыже музык тӱҥ верым налеш. Кажныже мурен да иктаж семӱзгар дене шоктен мошта. Мый кызыт фортепиано дене шокташ тунемам, тыгак мураш йӧратем. Родо-тукымем деч вараш ынем код. Нунын семынак усталыкем дене калыкым куандарынем, – ойла Мария.
Кажне выступлений изи спектакль але тошто книга гыч иланыше сӱрет гай лийын. Кужэҥер район Шӱдымарий тӱвыра пӧрт пеленысе «Ритм» клуб кресава ден кресачам ыштыме йӱлам ончыктен, а Морко район Кӱчыкэҥер тӱвыра пӧрт пеленысе «Изи шӱдыр» шоктышо ансамбль (снимкыште) шӱвыр, тӱмыр да шиялтыш йӱк дене кугезына-влакын илыме жапышке ик татлан кусарен.
– Ме уста кидмастар Петр Павлович Эчейкинын ыштыме семӱзгарже дене шоктена. Тиде моткоч кугу чап. Тудын семӱзгарлажым кидыш налын, тукымла кокласе кылын вийжым шижаш лиеш. Ты шижмашым арален кодымаш моткоч шергакан. Сандене тыгай сынан фестивальлашке уло кумылын ушнена, – ойлат Артём Григорьев ден Данил Александров.
Фестивальым иктешлыме почеш, фольклор произведенийым эн сайын ончыктышо семын Курыкмарий район Микрік йоча музыкальный школын «Шыжарвлі» кӱслезе-влак ансамбльже ойыртемалтын. «Сценыште ончыктымо эн сай программе» номинацийыште Марий Турек район Карлыган тӱвыра пӧрт пеленысе «Зардон» одо калык фольклор ансамбль сеҥышыш лектын.
Катя СЕРГЕЕВА.
Авторын фотожо.
