3 июль – ГИБДД-н кечыже.
Морко район Коркатово гыч Д.Кушакова деч серыш пурен: «Ачам ден авам шукерте огыл велосипедым налын пуэныт. Сайын кудалыштын моштем гынат, кугорныш лекташ огыт кўштӧ. Трассыш мыняр ияш лектын кертам?» Ӱдырын йодышыжлан вашмутым Российысе элгӧргӧ паша министерствын Морко районысо полиций отделжын старший участковый уполномоченныйже, майор С.О.СМИРНОВ пуа:
– Велосипед – тиде транспорт, а велосипедист – транспортым вӱдышӧ еҥ. Сандене тудо корно правилым сайын палышаш. Корнышто лӱдыкшыдымылыкым эскерен, писылыкым иземден але кугемден, кӱлеш могырыш савырнен кудалышт моштышаш. Кугорныш 14 ияш деч кугурак-влаклан лекташ лиеш. Туге гынат тӱткӧ лийман, лӱдыкшыдымылык нерген мондыман огыл. Рульым ик кид дене кучен, багажникыш еҥым шынден кудалыштман огыл. Кудалме годым телефон дене мутланаш ок лий. Шарныза! Корно правилым пудыртышо-влаклан штрафым тӱлыктат.
– Сергей Олегович, кугорныш лекше велосипедист-влакын вургемышт ойыртемалтше лийшаш вет?
– Шинчаш перныше, чевер тӱсан вургемым чияш тыршыман. Вургемыш тӱрлӧ форман светоотражательым икмыняр вере пижыкташ лиеш. Тыгодым водитель велосипед дене кудалшым тора гыч шеклана. Вуйышко ӧшлӧкым (шлемым) чияш мондыман огыл.
– Касеш кодшо велосипедист-влаклан мом палыман?
– Корныш лекме деч ончыч тормозым, йыҥгырым, фарым эре тергыман. Фар уке гын, йошкарге але ош тӱсан светоотражающий элемент ончылно да шеҥгелне лийшаш. Кок могырышто – саре але йошкар тӱсан светоотражатель.
С.О.Смирнов деч икмыняр ой-каҥаш:
- Велосипедым палыдыме еҥлан ида пу.
- Велосипедлан келыштарыме кєгєным кучылтса. Тудо кӱжгӱ да пеҥгыде лийшаш.
- Велосипедым йӱдлан уремеш ида кодо.
- Ӱштылалтдыме чия дене тӱрлӧ знакым але орнаментым велосипед рамеш але ораваш сӱретлен кертыда.
Е.ИВАНОВА.
