Миллион утла еҥан кугу олаште чолга марий ешым, марла кутырышо икшывым вашлиймеке, чоным куан веле огыл, кугешнымаш кумылат авалта. Воткыллаште, татар телепередачылаште Озаҥ ола гыч Ибатиевмытым (снимкыште) чӱчкыдын ужына. Ава Татьяна Эриковна ӱдыржӧ-влакын чонышкышт марий шӱлышым ош тӱням ужмекыштак шыҥдараш тӱҥалын.
Арина кызыт Озаҥ оласе 189-ше номеран гимназийыште нылымше классым тунем пытарен. Куд ияш Аня йочасадыш коштеш.
– Озаҥ олаште лу ий илена. Мый Шернур кундемыште шочынам, пелашем – Татарстан Республикысе Арск районышто. Коктынат марий улына. Икшывына-шамыч дене изинек марла гына мутланена. Вес йылмылан туныкташ шонымат огыл. Марий ешыште кузе рушла кутырет?! Арина йочасадыш кум ияш каен. Ик руш мутымат пален огыл, но кок тылзе жапыште рушла мутланаш писын тунемын. Йочасад деч ончыч рушла туныкташ кӱлеш манын шоненат омыл. Мемнан йыр рушла кутырышо-влак улыт гын, садак тунемеш. Ик жап марла ыш мутлане. Марла-рушла, пеле-пула мутлана ыле. Иктаж вич ияш улмыж годым, кажне шомакшым тӧрлатен-тӧрлатен, марла кутыраш туныктенам.
Изиракше йочасадыш руш йылмым пален каен. Тудо мультфильм гоч рушла тунемын. Аня татар йочасадыш логалын. Тушто татар кружок-влакат улыт. Мурым мурат, почеламутым каласкалат. Марий, руш йылмылам палымыже кумшо йылмым куштылгын тунемаш полша. Шылтыде каласем, Аня утларакше рушла мутланаш тырша. Кызыт Арина семынак, кажне мутшым тӧрлатен, марла ойлаш туныктем. Рушаҥеш гын, вескана марла кутыраш ок тӱҥал. Мый марла йодам, а тудо рушла вашешта гын, чонлан каньысырын чучеш, – ойла ава.
Ӱдыр-шамычлан Татарстан Республикысе калык-влакын келшымаш пӧртысӧ Рушарня школ кугу шӱкалтышым ышта. Тушто шочмо йылмылан муро, куштымаш, почеламут да моло йӧн дене кумылаҥдат. «Ал пеледыш» марий ансамбльыштат уло. Тӱрлӧ конкурсышто ятыр гана сеҥышыш лектыныт. Ибатиевмыт школышто эртаралтше мероприятийлашке, конкурслашке эреак ушнат. Нунын чолгалыкыштым ужын, тӱрлӧ телепередачышке марий калыкын ойыртемже, кочкышыжо нерген каласкалаш ӱжыт.
Рушарня школ тыгак шуко тӱрлӧ калык коклаште марий улмо дене кугешнаш тарата.
– Арина дене гимназийыште эртаралтше «Секреты дружного класса» мероприятийыште марий калык дене палдаренна ыле. Классыштыже икте-весыштын могай калык гыч улмыштым палат. Арина марий улмыж деч ок вожыл. Анян коштмо йочасадыште ешна дене тукым кокласе кылым, тукым гыч тукымыш куснышо йӱлам модын ончыктенна. Икманаш, кугу олаште марий шӱлышым, койышым аралаш йӧсӧ огыл. Тӱҥжӧ – марий улмет деч вожылман огыл. Келшымаш пӧртыштӧ верланыше марий автономият – мыланна кугу эҥертыш, грант полшымо дене шуко йӧным ышта. Тушто моло калык-влакат мемнам моткоч пагалат, – ойла Татьяна Эриковна.
Христина АЛЕКСАНДРОВА.
Н.АРСЛАНОВАН фотожо.
