Кугу пайрем

Пионер илыш гыч шарнымаш моткоч шуко. Кужэҥер район Нуръял ялысе тӱҥалтыш школышто кумшо классыште тунемме годым пионер радамыш ушнымем эн шерге. Тиде 1977 ийыште лийын. Туныктышына З.П.Ефимова 22 апрельлан школышко ош фартук дене толаш каласыш. Ты кечын линейкыш чумыргышна.  Шӱешыже йошкар галстукым кылден, школ директор, фронтовик В.Е.Ефимов мутым нале. В.И.Ленин, пионер нерген каласкалыш. Вара воктекше мыйым ӱжӧ да, тыршен тунеммемлан, чолга улмемлан мокталтен, галстукшым шӱешем пижыктыш. «Будь готов!» манын, кидшым нӧлталын, шинчашкем тура ончале. Мый «Всегда готов!» манын вашештышым. Классыште шкетын гына пионер радамыш ушнышым. Пырля тунемше ӱдыр-рвезе-влак 19 майыште йошкар галстукан лийыч. Шӱдымарий школышто тунемме годым вожатый Ю.А.Демьянова да класс вуйлатыше Д.А.Севрюгина мыланна йомак гай пионер илышым пӧлекленыт. Ме фермыште пашам ыштыше-шамычлан концертым ончыктенна. Мыняр ломыжым, макулатурым погенна! Макулатурым эн шуко погымемлан «Миллион – Родине» медальым кучыктеныт.Тений пионерийлан 100 ий темын. Тиде кугу пайрем дене чыланыштым саламлем.

Э.В.ЗАХАРОВА.

Параньга, Янгетсола.