Марий Элыште ятыр газет савыкталтеш. Тӱрлӧ йылме дене лекше савыктышым ме йывыртен лудына. Южо школыштат газетым ямдылат. Ноябрь мучаште Оршанке район Кугунур школышто «Мотор» газетын икымше номерже лектын. Марий тиште кече вашеш могай куанле увер!
«Знание» россий обществын эртарыме ача-ава-влакын сообществыштын инициативышт конкурсышто грантым сеҥен налмылан кӧра ты газет ош тӱням ужын. Кок чолга ава Елена Владимировна Бирюкова ден Анастасия Андреевна Охотникован надырышт поснак кугу. Кызыт школышто «Моторлан» директорын воспитаний шотышто советникше Е.С.Козлова мутым куча.
– Тыгай проект – ача-ававлакын оҥай да кӱлешан пашашт. Газетым йоча-влакым тӱшка пашаш ушымо, возымо мастарлыкым вияҥдыме шонымаш дене лукташ тӱҥалме. Могай лӱмым пуымо шотышто ятыр жап каҥашенна. «Мотор» шомак кумылнам савырен, молан манаш гын тудо, эн ондак, марла йоҥга, рушлат мом ончыктымыж дене келшен толеш. Газетым савыкташ ятыр оборудованийым налынна. Ты пашамат ача-ававлак шуктеныт. Нунылан – пеш кугу тау, – ойла Елена Семеновна.
Газетым ямдылымаште коло утла йоча пашам ышта. Савыктыш тылзылан ик гана лектеш. Тӱҥ редактор, журналист, фотограф, сӱретче, верстальщик улыт. Школысо савыктыш тӱрлӧ лаштыклан, темылан поян лийшаш. Утларакше школ уверла дене палдарат. Конкурс, таҥасымаш, олимпиаде нерген серен, тушко ушнаш таратат. Икте-весыштым шочмо кече дене саламлат, анекдотым, уш пудыратыше кроссвордым савыктат. Кугу кӱкшытыш шушо выпускник-влак деч интервьюм налаш шонат. Газетыште, тӱҥ шотышто, рушла возымо материал — шамыч савыкталтыт гынат, марий йылме нергенат монден огытыл. Икмыняр паша марла лектеш.
– Усталык шӱлышан ӱдыр-рвезе-шамыч лым лийде тыршат. Савыктышым ача-авалан, коча-ковалан, родо-тукымыштлан пуэдат. Йоча-влак икте-весышт деч примерым налыт, сайынрак возаш тунемыт, шонем. Кугунур школышто «Мотор» икымше. Тудын ӱмыржӧ кужу лийже! – ойла Елена Козлова.
Христина АЛЕКСАНДРОВА.
Снимкыште: самырык журналист-влак Вера Нигаматзянова ден Анна Вараксина, фотограф Анна Козлова, тӱҥ редактор, верстальщик Анастасия Мухаметова.
Фотом школ архив гыч налме.
